हानं मधेसयात व्यागलं तयेगु ख“

नेपाः नाप च्वनेमयः धकाः बारम्वार धम्की विया वयाच्वंपिं मधेसवादी नेतातय्सं हानं वहे धम्कीयात दोहरे यायेगुकथं सरकारय् च्वनाच्वंम्ह छम्ह मन्त्रीं पित हःगु दु । डा. बाबुराम भट्टराईया सरकारय् सूचना व सञ्चार मन्त्री जयप्रकाश गुप्तां उगुकथंया खँ हःगु खः । मधेसया माग सम्वोधन मजूगु व मधेसया नां तक्कनं मदुगु निगू प्रदेश दयेकाः मधेसयात कुचा थःगु नं गुप्ताया द्वपं दु । थुगुकथं राज्य पुनर्संरचना आयोगं नं वयकः पिन्त धों लाःगु नं वयकःया आरोप दु । उकिं नकतिनि ११ गू प्रदेशया अवधारणायात नं मधेसीतय्सं नालाकायेमफैगु अभिव्यक्ति वियाः आयोगया सिफारिसयात कार्यान्वयन मयाकेगु धयावयाच्वंगु स्थितिइ मधेसी जनतायात राष्ट्रियधारं व्यागलं तयाः विभेद जाःगु व्यवहार यानाच्वंगु धयागु नेतातय्गु द्वपं निरर्थक दु ।

मधेसी जनतायात गवलें नं विभेद याःगु मदु । विभेद यासा अनयाहे पार्टीया नेतातय्सं खः । विभेदया हा स्वनेगु ज्या इमिसं याना वयाच्वंगु दु । भारतया ध्यबा लगानी यानाः पार्टी चायेकेगु, पार्टी कुचा थलेगु निसेंकयाः मधेसय् हिंसा हत्या आतंक लूट अपहरणया घटनां न्हि छ्याय् मालाच्वंपिं तराइया जनतायात दकले न्हापांला पार्टी व नेता धकाः न्ह्यःने वयाच्वंपिन्त अनया जनतां वांछ्वये फयेमाः । मखुसा भारतं म्हिता वयाच्वंगु नेतृत्वदायी भूमिकां अनया जनता व्यागलं च्वने फैमखु । मधेसी जनअधिकार फोरम गणतान्त्रिकया नायः नापं जुयाच्वंम्ह गुप्तां नेपाः दुने च्वनाः इमिगु समस्याया समाधान मजुइगु व नेपाः राज्यं सम्वन्ध त्वाथलाः भारतया सिक्किम भुटानथें जूवनेगु धम्कि विया वयाच्वंगु दु । इमिसं मागय् याःथे छगू प्रदेश मधेसयात भारतय् यंकेगु मनसायं सञ्चार मन्त्री गुप्तां उगुकथंया धम्की वियावःगु खः ।

मधेसीतय्गु छगू प्रदेशया माग जायज मदु । मेमेगु आदिवासी जनता दुगु मधेसयात छगू प्रदेश दयेकेहे फैमखु । तर मधेसी नेतातय्सं मात्रै भारतया दवावय् छगू प्रदेशया माग यानावयाच्वंगु दु । थुकिया ल्युने अन्तत तराईया २२ जिल्ला भारतय् विलय् यायेगु भावी उदेश्य व ग्वसाः कथं न्ह्यःने वयाच्वंगु जक मखुला धयागु न्ह्यसः नं थनेगु यानाहःगु दु । तराईया २२ जिल्लाया छगू प्रदेश दयेकाविलकि कन्हय् वनाः नेपाः राज्यनाप स्वापू त्वाथलाः भारतया छगू प्रान्तकथं गाभय् यायेगु नियतं ज्या जुयाच्वंगु वुलुगु किपाः बुलुंबुलुं स्पष्ट जुजुं वनाच्वंगु दु । सञ्चार मन्त्री गुप्तां वइगु संविधानसभाया म्याद फुइवं थःपिनिगु माग सम्वोधन मयात धाःसा वर्तमान राज्य नापया स्वापू चºफुना थःपिं स्वतन्त्र जुइगु खँ जक ल्हानाच्वंगु मदु, नापनापं उगु अवधीया दुने नं मधेसय् माग मन्यँन धाःसा संघर्षय् ग्वाय हयेगु ख्याच्वः वियावया च्वंगु दु । वनं शान्तिपूर्ण संघर्ष मजुसे हिंसक, विध्वंसात्मक व तोडफोडया संघर्ष न्ह्याकेगु धयावयाच्वंगु दु । थुज्वःगु कथंया संघर्षया खुल्लेआम घोषणा याइम्ह सञ्चार मन्त्रीयात मन्त्रीपदं वर्खास्त यानाः कानुनी कारवाही न्ह्याकेमाः । छाय् धाःसा संविधान शान्तिपूर्ण संघर्ष शान्तिपूर्ण आन्दोलन यायेत जक छुट वियातःगु दु, हिंसात्मक, विध्वंसात्मक व तोडफोडया आन्दोलनप्रति नेपाली जनतायात स्वीकार्य मजुइगु खँ खः । ब आः हानं मधेसय् आन्दोलन जुल धाःसा मधेसी जनता म्हो व भारतीय सरकारं छ्वइपिं गुण्डात अप्वः जुइगुलिं हे सञ्चार मन्त्री गुप्तां उगु आन्दोलन हिंसात्मक, विध्वंसात्मक व तोडफोडया आन्दोलन जुइगु धाःगु खः । थुकिं स्थिति नेपाः व नेपाली जनताया प्रतिकुल जुइगु निश्चित खः ।

More Stories Like this