कांग्रेसलिसे ल्वाइपिं चकनाचुर जुइ : कोइराला
येँ (झीगु स्वनिगः)
संविधानसभाया चुनावय् जम्मा ११२ सिट जक त्याकेत ताःलाःगु प्रमुख प्रतिपक्ष दल नेपाली कांग्रेसया सभापति सुशील कोइरालां इतिहासंनिसें हे कांग्रेसलिसे सु ल्वाइ इपिं चकनाचुर जुयाच्वंगु दु धकाः न्ह्यथसें आः नं अथे हे चकनाचुर जुइ धकाः धयादीगु दु ।
कांग्रेसयासिबें संविधानसभा निदुगं सभासद्त दुगु संविधानसभाय् दक्ले तःधंगु दल एकीकृत माओवादीयात कांग्रेसया नेता कोइरालां ख्याच्वः बिइगु झ्वलय् अथे धयादीगु खः । म्हिगः बुधवाः विराटनगरय् जूगु क्षेत्रिय स्तरया सम्मेलनय् न्वंवायेगु झ्वलय् वय्कलं अथे धयादीगु खः ।
नेता कोइरालां धयादिल ‘माओवादीयात यक्व हे सम्झेयायेगु ज्या जुयाच्वंगु दु । प्रजातन्त्र विरोधी ज्या यायेमत्य धकाः । प्रजातन्त्र व कांग्रेसया इतिहासयात ल्वःमंकल धाःसा माओवादी नं राजतन्त्र थें हे समाप्त जुइ । जिमिसं प्रजातन्त्र व जनतालिसे खेलबाड यायेमते धयाच्वनागु दु । मानेमजुल धाःसा कुबिया जुइ मखु ।’ कांग्रेसया सभापति कोइराला माओवादीप्रति तसकं आक्रमक रुपं प्रस्तूत जुया प्रजातन्त्र व कांग्रेसया विरोधय् न्ह्याथे जाःम्ह वःसां नं समाप्त जुयाच्वंगु इतिहास दु धकाः न्ह्यथसें धयादिल ‘नेपाःया इतिहासय् सु सु प्रजातन्त्र व कांग्रेसलिसे टकराबय् वल इपिं चकनाचुर जुयाच्वंगु दु ।’
वय्कलं तत्कालिन जुजु ज्ञानेन्द्रयात कांग्रेसं हे यक्व अबसर ब्यूसां नं प्रजातन्त्र व जनविरोधी ज्या याये त्यनेवं २ सय् ४० दँया इतिहास दुगु राजतन्त्र समाप्त यानागु दावी न्र यानादिल । वय्कलं छगू कथं प्रजातन्त्रया पर्यावाचि हे कांग्रेस जूगु अले माओवादी ला प्रजातन्त्रया विरोधी पार्टीया रुपय् प्रस्तूत यानादीगु खः । कांग्रेसया नेता कोइराला अथे माओवादीप्रति तसकं आक्रमक जुयाः सार्वजनिक रुपं न्वंवानादीगुयात मनूतय्सं अर्थपूर्ण रुपं कयाहःगु दु ।
