संसद व एमालेया बैठक स्थगित
येँ (झीगु स्वनिगः)
व्यवस्थापिका संसदया म्हिगः बुधवाः च्वनेगु धयातःगु बैठक स्थगित जूगु दु । लगातार च्याक्वः तक कांग्रेस व एमालेया नेतातय्सं पंगः थनाः अबरुद्ध यानाः वयाच्वंगु खःसा म्हिगः धाःसा सुचं तिकाः अथे संसदया बैठक स्थगित याःगु खः । संसदया बैठक थौं विहिवाः सनिलय् ३ बजे च्वनेगु धकाः सुचनाय् न्ह्यथनाचःगु दु ।
कांग्रेस व एमालें जनसत्ताया ज्यायत सरकारं बैधानिकता बिइगु धकाः निर्णय याःगु खारेज मजूतले हे संसद न्ह्याके बिइगु जुइमखु धकाः अबरुद्ध यानाः वयाच्वंगु खः । थ्व हे दथुइ एमालेया म्हिगः बुधवाः हे च्वनेगु धयातःगु पोलितब्यूरोया बैठक नं स्थगित जूगु दु । वइगु फागुन २१ गतेनिसें येँय् जुइगु धयातःगु प्रतिनिधि परिषद्या बैठक तयारीया झ्वलय् अथे पोलितब्यूरोया बैठक च्वनेगु धयातःगु खः । नेतातय्गु व्यस्तताया कारणं धकाः एमालें बैठक स्थगित याःगु खः ।
