मन्त्रीपरिषद्या बैठक धुंकाः जक निकास

येँ (झीगु स्वनिगः)

संविधानसभाया प्रमुख स्वंगू दल एकीकृत नेकपा (माओवादी), नेपाली कांग्रेस व एमालेया शीर्ष नेतातय्गु दथुइ म्हिगः बुधवाः जूगु वार्तां मन्त्री परिषद्या बैठक लिपा जक निकास बिइगु कथंया निर्णय यायेगु धकाः सहमति याःगु दु । गोकर्ण रिसोर्टय् च्वंगु स्वंगू दलया शीर्ष नेतातय्गु वार्ताय् प्रधानमन्त्री डा. बाबुराम भट्टराई नं जनसत्ताया ज्यायात सरकारं बैधानिकता बिइगु धकाः निर्णय याःगु फुक्कसिगु चासो जूगुलिं उपयुक्त कथं मन्त्री परिषदं थौं विहिवाः निर्णय यायेगु बचं बियादीगु खः । अथे मन्त्री परिषद्या निर्णय जुइ धुंकाः जक शान्ति व संविधानया बारे दलतय्गु दथुइ बैठक च्वनाः माःगु कथं निकास बिइगु जुइ धकाः नेतातय् दथुइ सहमति जूगु दु ।

उगु वार्ताय् ब्वति कयादीम्ह छम्ह नेतां संचारकःमितलिसे खँल्हायेगु झ्वलय् प्रधानमन्त्रीं जनसत्ताया ज्यायात बैधानिकता बिइगु मन्त्री परिषद्या निर्णय थौं विहिवाः लित कायेगु मन्त्री परिषदं निर्णय यानादी अले व्यवस्थापिका संसद् प्रधानमन्त्रीं हे सम्वोधन नं यानादी । नेपाली कांग्रेसया संसदीय दलया नेता रामचन्द्र पौडेलं संचारकःमितय्त धयादिल ‘वार्ता तसकं सकारात्मक व सौहाद्र्र वातावरणय् क्वचाल । वार्तायात कार्यरुप बिइगु खःसा शान्ति व संविधान च्वयेगु प्रक्रिया न्ह्याः वनी ।’ अथे हे एमालेया नेता भीम रावलं धयादिल ‘प्रधानमन्त्रीं विपक्ष पार्टीतय्गु माग व सर्वोच्च अदालतया आदेशयात ध्यानय् तयाः सकलसित मान्य जुइगु कथं निर्णय यानाः सदनय् जानकारी बिइगु धयादीगु दु ।’

अथे हे एकीकृत माओवादीया छ्याञ्जे सीपी गजुरेलं कांग्रेस, एमालेया नेतातय्गु चासो व सर्वोच्च अदालतया अन्तरिम आदेशयात ध्यानय् तयाः थौं विहिवाःया मन्त्रिपरिषद्या बैठकय् निणय् याइ धकाः जानकारी बियादीगु दु । वार्ताया बारे संचारकःमितलिसे खँल्हासें नेपाली कांग्रेसया बरिष्ठ नेता शेरबहादुर देउवां धयादिल ‘भाषा न्ह्याथेजाःगु प्रयोग याःसा नं जनसत्ताया निर्णययात मन्त्री परिषदं खारेज याइ ।’ वार्ताय् स्वेच्छिक अवकास ल्यःपिं लडाकुतय्गु चेक लाकाकाःगु बारे छानविन यायेगु सहमति जूगु दु । उगु विषययात कयाः निर्णय यायेत थौं विहिवाः हे सेना समायोजन विशेष समितिया बैठक च्वनीगु जूगु दु । अथे हे बैठकं सत्य निरुपन तथा मेलमिलाप आयोग व बेपत्ता खोजविन आयोग गठन सम्वन्धी विधेयकय् दुगु विवाद ज्यंकेगु भाला स्वंगू दलया निगूगु तहया नेतातय्त ब्यूगु दु । उगु हे कथं राज्य पुनर्संरचना आयोगया प्रतिवेदनयात कयाः नं सहलह जूगु खः ।

प्रधानमन्त्रीं लडाकु समायोजनय् हाकनं अज्वःगु हे कथंया समस्या वयेफु धयादिसें ब्यागलं कथंया अनुगमन संयन्त्र दयेकेगु प्रस्ताव तयादीगु खः धकाः माओवादीया छ्याञ्जे सीपी गजुरेलं जानकारी बियादीगु दु ।