वाशिङटनय् समलिङ्गी इहिपाया विधयेक पारित

सं.रा. अमेरिकाया वाशिङटन राज्यय् थौं समलिङ्गी इहिपाया विधयेक पारित जूगु दु । वुधवाः थुकिया बारे वाशिङटनया प्रतिनिधि सभाय् जूगु मतदानय् ५५ मत मध्यय् ४३ मत थुकिया पक्षय् वःगु खः । वंगु वालय् सिनेटया मतदानय् कुल २८ मध्यय् २१ मत थुकिया पक्षय् वःगु खः ।

विधयेक पारित जुइधुंकाः वाशिङटन राज्य समलिङ्गी इहिपा कानूनी जूगु अमेरिकाया न्हय्‌गूगु राज्य जूगु दु । थ्व स्वया न्ह्यः सं.रा. अमेरिकाया न्यूयोर्क, कनेक्टिकट, आयोवा, म्यास्याच्यूसेट्स, न्यूह्याम्पशियर, भरमन्ट, व वाशिङ्टन डिसीइ समलिङ्गी इहिपायात कानूनी घोषणा यानातःगु खः । न्यू जर्सी राज्यय् समलिङ्गी इहिपाबारे मेगु वालय् मतदान जुइगु जूगु दु ।

More Stories Like this