थौकन्हेया न्यंकंबाखं
पुष्प तुलाधर
छचा थथे म्हगस जिं म्हंका
छपु वा लँय् लुइका,
व वा छपुं छेंया ल्यूनेसं
क्यवचाय् पिना,
कन्हेकुन्हु सुथय्
व वाया चुलिं
छमा ब्वलंगु खनाः
जिगु मिखा अजू चाइ ।
व माया कलमि जिं ल्ह्यया,
जिगु भुतुली
छगः गमलाय्
न्हियान्हिथं ह्वासाह्वासां
गमला छग्वलं कयेच्यानाः
भ्वाक्क चिना बिइ मा
व मा जिगु भुतुली
सकलसिगु मिखाय् थाइ ।
व माया कचाय् कचाय्
चुलि ब्यनाः
ईपांथिपां सयाबी
चिग्व मल्ता पाय्ग्वःगु सि
चाकु माकुगु यःमरि
जिगु भुतुली ज्वरे जूगु
नसाज्वलं थुलि साक्क
सवाः थाहां वयाबी
झस्स लुमनी, जि मचाबलय्
जिमि अजिं कना थकूगु
न्यंकंबाखं ध्वंच्वलेचा,
थौकन्हेनं, मभिंम्ह चिरिमामं
ध्वंच्वलेया लालिसें याःगु ब्यलि लिपा
क्वँय् थुने यंम्ह पुनखुं मैचां
लँय् त्वःफिका थकूगु ला छु
व ध्वंच्वलेचिया छपु वा ।
Related Stories
दुहिसि मुलुच्वका नुगःचु लिपस्टिकMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
