मन्त्रीतय्सं आचार संहिता अःखः भ्मण खर्चकाल

मितव्ययिताया ध्वांना पुयाः प्रधानमन्त्री जुयादीम्ह डा. बाबुराम भट्टराईया मन्त्रीतय्सं थःपिसं दयेमाःगु आचार संहिताया अःखः भ्रमण खर्च कयाः मनूतय्त अजू चायेकूगु ज्या जूगु दु । जिल्ला भ्मणया इलय् मन्त्रीतय्सं मितव्ययिताया नीति नालेमाल धकाः प्रधानमन्त्री भट्टराईं निर्देशन व्यूगु छुं न्हि लिपाहे मन्त्रीतय्सं जिल्ला भ्रमणया नामय् अथ्यहे १ करोड ध्यबा कया व्यूगु दु । थ्व मन्त्रीतय्गु अस्वभाविक व अव्यवहारिक चरित्र खः । वंगु कार्तिक महिनां जक डा. भट्टराइया मन्त्रीपरिषदं २७ बुंदे आचार संहिता दयेकूगु खः । सरकारी ज्या त्वःताः स्वदेश वा विदेशय् विनाकारण भ्रमण यायेमदुगु धाःगु खः । भ्मणय् वनेहे माःसां स्वन्हु स्वयाः अप्वः च्वनेमज्यूगु नं उगु आचार संहिताय् न्ह्यथनातःगु खः । भ्रमणय् वनेवलय् नं सरकारी आवासया व्यवस्था दुथाय् होटल लजय् च्वनेमज्यूगु नं धयातःगु खः । पार्टीया ज्याय् वनेवलय् सरकारी कोषं खर्च कायेमज्यूगु, थःगु गृह जिल्लाय् वनेवलय् नं लच्छिया छक्वः अप्वः वनेमदुगु, छम्ह निजी ग्वाहालिमि व छम्ह जक सुरक्षा कःमि यंकेमाःगु प्रावधान स्पष्ट शब्दं च्वयातःगु खः । तर व्यवहारय् भट्टराईया सरकारया अप्वः मन्त्रीतय्सं थुगु आचारसंिहताया छुंनं खँयात पालन यानावःगु खनेमदु । सरकारी आवासया व्यवस्था दुथाय् नापं होटल खर्च कयाः तप्यंकहे आचार सहितायात उल्लंघन याःगु दु । मन्त्रीतय्सं न्ह्यब्वःगु विलयात कयाः खः मखु, ज्यू मज्यू धयागुहे मस्वसे भुक्तानी बीगु ज्या जूगु दु ।

अप्वः भ्मणयानाः भ्रमण खर्च अप्वः काःपिं मध्ये स्थानिय विकास मन्त्री टोपवहादुर रायमाझी व संस्कृति मन्त्री गोपाल किराती न्ह्यःने लाः । वयकःपिं निम्हमध्ये रायमाझीं खुलाया दुने ४,८१,००० ध्यबा काःगु दुसा किरातीं ४,३२,००० ध्यबा काःगु दु । किरातीं झापा जिल्ला छगू वाहेक मेगु फुक्क थासय् होटलय् च्वंगुया विल पेश यानाः ध्यबा काःगु खः । रायमाझीं सरकारी आवासया व्यवस्था दुगु अर्घाखाँची, सिन्धुपाल्चोक, बारा, कास्की, दोलखा, ओखलढुंगा, स्याङजा, रुपन्देही, कपिलवस्तु, तनहुं, गुल्मी, पाल्पा, कैलाली, लमजुङ्ग लगायत जिल्ला भ्रमणय् नं होटलया विल पेशयानाः भुक्तानी काःगु दु ।

अथ्यहे उपप्रधान लिसें गृहमन्त्री विजय कुमारगच्छेदारं न्यालाया दुने न्हय्गू जिल्लाया भ्रमण यानाः ३,२७,००० ध्यबा काःगु दु । थ्व नं होटल खर्च वाहेक खः । स्वास्थ्य मन्त्री राजेन्द्र महतों २,९५,०००, अर्थमन्त्री वर्षमान पुनं १,७७,०००, शिक्षामन्त्री दिनानाथ शर्मां २,७५,००० ध्यबा काःगु दु । अथ्यहे यानाः सिंचाइ मन्त्री महेन्द्र यादवं १,२४,०००, पर्यटनमन्त्री लोकेन्द्र विष्टं १,८८,०००, भूमि सुधार मन्त्री भीमप्रसाद गौतमं १,६५,०००, सामान्य प्शासन मन्त्री राजकुमार यादवं ६६,०००, उद्योगमन्त्री अनिल झानं ३,६८,०००, वृजेस कुमार गुप्तां २,९७,०००, वातावरण मन्त्री हेम राज तातेडं ३,९७,०००, कृषिमन्त्री नन्द कुमार दत्तं ३,२९,०००, खेलकुद मन्त्री कमला रोकां १,४९,०००, विनाविभागीय मन्त्री राजलाल यादवं १,९२,०००, वनमन्त्री वकिल मुसलमानं ६७,०००, महिला मन्त्री दानवहादुर चौधरीं ३,५१,०००, सञ्चारमन्त्री जयप्रकाश गुप्तां १३,००० ध्यबा काःगु दु । विज्ञान मन्त्री कल्पना धमलां १,१०,०००, शक्तिमन्त्री सत्य पाहाडीं १,३५,००० व दकले म्हो ३५,५०० काःम्ह श्रममन्त्री सरिता गिरी खः ।

थुगुकथं थःपिसं दयेकागु आचारसहितायात कुचाकुचा थलाः भ्रमण खर्चया रुपय् १ करोड ति ध्यबा कायेधुंकूगु दु । थःपिसं दयेकाःगु नियमयात पालन यायेमफुपिसं देश व जनताया नितिं छुं याइ धयागु खँय् नापं न्ह्यसः थनाहःगु दु । मन्त्री जुयाः नियमय् मच्वंसा ल्यं सरकारया सचिव व कर्मचारीतपाखें आशा यायेगुहे व्यकार खः । नियम उल्लंघन व भ्रष्टाचार अप्वइगु वाहेक देशय् मेगु छु जुइ ? भ्रमण खर्च काःपिं मन्त्रीतय्सं पेशयाःगु विलत गुलित सही खः ? आचार सहित विपरित आचरण क्यपिं मन्त्रीतय्त भुक्तानी वी न्ह्यः हे छानविन यानाः जक भुक्तानी बीमाःगु खः । तर सरकारया लापर्वाहीया फाइदा मन्त्रीतय्सं) कयां त्वःतल ? थुकिया नितिं अख्तियारंहे न्ह्यःने वयेगु लाकि ?

More Stories Like this