माओवादीयात नोमतुइगु कांग्रेसया नेतातय्गु ख्याच्वः

येँ (झीगु स्वनिगः)

नेपाली कांग्रेसया नेता डा. रामशरण महतं न्हय्न्हुया दुने सरकारं सहमति कार्यान्वयन यानाः सेना समायोजनया प्रक्रिया न्ह्याकेगु ज्या मयात धाःसा एकीकृत माओवादीया नेतातय्त नोतुइ मदु यायेगु जुइ धकाः ख्याच्वः बियादीगु दु । प्रधानमन्त्री विरुद्ध व्यवस्थापिका संसदय् अविश्वासया प्रस्ताव यंकेगु जुइ धकाः ख्याच्वः बियादीगु दु । म्हिगः मंगलवाः येँय् जूगु साक्षात्कार ज्याझ्वलय् न्वंवासें कांग्रेसया नेता महत्तं अथे ख्याच्वः बियादीगु खः । वय्कलं न्हय्न्हुया थःपिन्सं अल्टिमेटम बियागु खँ न्ह्यथसें यदि थःपिनिगु मागयात सम्वोधन मयात धाःसा एमाले व कांग्रेसया ेनतातय्सं बाध्य जुयाः माओवादी विरुद्ध गम्भीर कथंया पलाः ल्ह्वनेगु जुइ धकाः नं धयादिल ।

अज्वःगु गम्भीर पलाः छु खः धकाः संचारकःमितय्सं न्यंगु न्ह्यसःया लिसः बिइगु झ्वलय् नेता महतं सरकार विरुद्ध अविश्वसाया प्रसताव, माओवादीलिसे संवाद बहिस्कार न्ह्याथेजाःगु नं जुइ धकाः धयादिल । उगु ज्याझ्वलय् एमालेया नेता भीम रावलं प्रधानमन्त्री डा. बाबुराम भट्टराई नं सहमति कार्यान्वयन मयासे पदय् च्वनाच्वनेगु धकाः जक बिचाः मयायेत ख्याच्वः बियादिल । वय्कलं न्हय्न्हुया दुने सेना समायोजन प्रक्रिया व सहमति कार्यान्वन मयात धाःसा वर्तमान सरकार क्वःदली अले वास्तविकता ज्वनाः जनतायाथाय् वनेगु तयारी जुयाच्वंगु खं खुलासा यानादिल । नेता रावलं सहमति याये धुंकाः न्हून्हूगु कथं पंगःत थनेगु माओवादीया रणनीति खः धकाः धयादिसें आः एमाले व कांग्रेस जानाः गम्भीर पलाः ल्ह्वनेगु जुइ धकाः नं धयादिल । वय्कलं राज्य पुनर्संरचना आयोगया प्रतिवेदन अस्वीकर यायेगु जुइ धयादिसें सुदरपश्चिमया ९ जिल्लाया सुदूरपश्चिम राज्यया माग तकं यानिादिल । ज्याझ्वलय् प्रधानमन्त्रीया प्रमुख राजनीतिक सल्लाहकार देवेन्द्र पौडेल सुनलं प्रधानमन्त्रीया राजिनामाया माग बेतुक व बेमौसमी रागया संज्ञा खः धयादिसें गुगु नं हालतय् प्रधानमन्त्रीं राजीनामा बिइगु ज्या जुइमखु धकाः धयादिल । वय्कलं बहुमतया सरकारया माग सतकय् च्वनाः याःगुया अर्थ मदु धकाः नं धयादिल ।