बास्तोलाया गाडी नं वाइसीएलपाखें कब्जा
बैतडी (झीगु स्वनिगः)
एमाओवादीया सेती महाकाली इन्चार्ज नापं पोलिटब्युरो दुजः धर्मेन्द्र बाँस्तोला व केन्द्रीय दुजः भीम कडायतं छ्यलादीगु बा ००१ अ ३७ नं. या गाडी बैतडी व दार्चुलाया सीमाना गोकुलेश्वर लागां वाइसीएलं कब्जाय् काःगु दु । दार्चुलाया लटिनाथय् जुइगु बैठकय् सहभागी जुइत वंपिं नेतातय्त जनमुक्ति सेना सरह थःपिन्त नं सुविधा दयेमाःगु माग यानाः म्हिगः मंगलवाः सुथय् गाडी कब्जा कयागु दु धकाः वाइसिएल दार्चुला संयोजक कल्याणसिंह धामीं धयादीगु दु । एमाओवादी नेताया गाडी कब्जाय् काये धुंकाः वाइसिएल संयोजक धामीें जिल्ला बैठक तकं याके बिइगु जुइमखु धकाः दावी यानादीगु दु ।
नेता बाँस्तोला व कडायतं वाइसिएलया माग जायज जूगु व पार्टी नेतृत्वपाखें सम्बोधनया नितिं पहल यायेगु धयादीसां नं तत्काल पुरा मजूतले हे गाडी लितबिइगु जुइमखु धकाः धामीं धयादिल । बैतडीया पाटनय् मङ्गलबार बैठक क्वचायेकाः दार्चुलापाखे वनादीपिं नेतातपाखें बैतडी व दार्चुलाया सिमाना गोकुलेश्वर लागां वाइसिएलं कब्जाय् काःगु नं जानकारी बियादीगु दु ।
