वाइसीएलयात माओवादीया हे ‘प्याकेज’
राज्य पुनर्संरचना आयोगया सैद्धान्ति आधारय् सहमति
येँ (झीगु स्वनिगः)
स्वेच्छिक अवकासय् वनीपिं लडाकुयात सरकारं बिइगु आर्थिक प्याकेज सरहया माग यानाः आन्दोलनय् क्वहां वयाच्वंपि योङ कम्युनिष्ट लिग (वाइसिएल)यात एकीकृत नेकपा (माओवादी) पार्टीं हे अज्वःगु प्याकेज बिइगु जूगु दु । एकीकृत माओवादीया म्हिगः मंगलवाः च्वंगु स्थायी समितिया मुँज्यां उगु कथंया निर्णय याःगु खः ।
माओवादीया सचिव सीपी गजुरेलं वाइसिएलयात उगु कथं प्याकेज पार्टीं हे बिइगु धकाः निर्णय याःगु खँ संचारकःमितय्त जानकारी बियादीगु दु । संविधानसभाया निर्वाचनया नितिं शिविर त्वःताः वाइसिएल जूपिं पुलांपिं लडाकुतय्त अथे आर्थिक प्याकेज बिइत्यंगु खः धकाः नं धाःगु दु ।
थःपिन्त पार्टीया नेतृत्वं लडाकु सरह हे ब्यवहार यायेगु नापं इमिगु योगदानयात मूल्यांकन यायेगु धकाः बचं बियाः अथे संविधानसभाया चुनावया इलय् शिविरं पिने हयाः वाइसिएल दयेकूगु खःसा उकियात हे कयाः इपिं सोमवाःनिसें आन्दोलनय् क्वहां वःगु खः । बहिर्गमित जनमुक्ति सेना नेपाल व वाइसिएल जानाः सुदूरपश्चिमय् च्वंगु माओवादीया ज्याकू तकं तालाबन्दी यायेगु नापं शिविरय् वनेगु लँय् तकं पंगः थनेगु व विद्युतया लाइन तकं चानाः बिइगु ज्या याःगु खः । उगु घटना जुइ धुंकाः थौं सुथय् माओवादीया स्थायी समितिया मुँज्या च्वनाः इमिगु माग सम्वोधन यायेगु कथं अथे अवकास ल्यःपिं लडाकुतय्त थें हे पार्टीं आर्थिक प्याकेज बिइगु धकाः निर्णय याःगु खः ।
उगु हे कथं मुँज्यां शिविरय् च्वनाच्वंपिं घाःपाः जूपिं, अपाङ, मचाबूपिं लडाकुतय्त नं विशेष प्याकेज घोषणा यायेत सरकारयात निर्देशन ब्यूगु दु । अथे हे प्रमुख दलतय्गु सहमति कथं सरकारं दयेकूगु राज्य पुनर्संरचना आयोगया प्रतिवेदनय् छुं छुं खँय् सैद्धान्तिक सहमति व छुं छुं खँय् विमति दु धकाः न्ह्यःथंगु जानकारी नं नेता गजुरेलं बियादीगु दु । वयक्लं संचारकःमितलिसे खँल्हासें धयादिल ‘पहिचान व सामथ्र्यताया आधारय् राज्य पुनर्संरचना यायेगु आयोगया सुझावयात सैद्धान्तिक सहमति प्वंकूगु दुसा चितवनयात कुचा थलेगु, शेर्पा प्रदेश थेंज्याःगु प्रदेशयात चीकेगु प्रस्ताव याःगु खँय् धाःसा असहमति प्वंकूगु दु ।’
