"जिगु जेनेरेशनया नेवाः पासापिं मार्फत नेपालभाषाया उत्थान याये मास्ति वः" - रश्मिता नकःमि, मिस नेवाः पोखरा ११३२
नकतिनि क्वचाःगु मिस नेवाः पोखरा ११३२ त्याकादीम्ह मय्जु रश्मिता नकःमिलिसे नेपालमण्डल डट कमं यानागु बःचाधंगु खँल्हाबल्हा ।
दक्कले न्हापां निक्वःखुसी जूगु मिस नेवाः पोखरा ११३२ त्याकादीगुलिं यक्व यक्व भिंतुना । थौंकन्हय् छु याना च्वना ?
सुभाय् । थीथी सम्मान ज्याझ्वः व रेडियो आदिया अन्तर्वार्ताया व्यस्तता लिसेलिसें जिं थःगु ज्या सुरु यानागु दु ।
थ्व मिस नेवाः पोखराय् गुकथं ब्वति काये खनागु खः ?
नेवाः मिसातय्सं थःगु प्रतिभा न्ह्यब्वयेत नेवाः खलः कास्कीपाखें तसकं बांलाःगु अवसर ब्यूगु दु । नेवाः खलः कास्कीपाखें थ्व ज्याझ्वः मयाःगु जूसा थज्याःगु ज्याझ्वलय् ब्वति कायेगु जितः अवसर मदइगु जुइ । अले जिमि परिवारया नं थुकिइ तःधंगु ल्हाः दु सुनां जितः माःगु ग्वहालि व प्रेरणा बिल ।
निक्वःगु मिस नेवाः पोखरा ११३२ जुयादिल, गजाःगु अनुभव जुल?
जि तसकं लय् ताया । थुगु ज्याझ्वलं जितः छगू न्हूगु नां 'मिस नेवाः पोखरा ११३२' ब्यूगु दु अले तःधंगु जिम्मेवारी नं ।
थज्याःगु इभेन्टयात गुकथं कायेमाः थें च्वं? थुज्वःगु ज्याझ्वलं नेवाः समाजयात गज्याःगु प्रभाव लाकी ?
एक्काइसौं शताव्दीइ थ्यने धुकाः नं नेवाः मिसाता ल्यूने लानाच्वन । झीसं समाजय् थःगु प्रतिभा क्यने मखना च्वन । थज्याःगु ज्याझ्वलं नेवाः मिसातय्सं थःगु प्रतिभा ब्वयेगु नापं थःगु संस्कृति, परम्परा, नखःचखः व भाषा बारे सिइकेगु अवसर दइ । जिं स्वये हरेक नेवाः मिसातय्सं थज्याःगु ज्याझ्वलय् ब्वति कयाः थःगु करिअर दयेकेगु व समाजयात छुं बिइगु यायेमाः थें च्वं ।
नेवाः जुयाः नेवाः भाये गुलि तक ल्हाये सः ? भाय् ल्हाये सःसा गुलि तक ल्हाना? वा मसःसा सयेका थ्व भाय् ल्हायेगु इच्छा गुलि तक दु?
अँ जिं नेवाः भाय् ल्हाये सः । विशेष यानाः परिवार व पासापिंलिसे नेवाः भासं हे खँ ल्हाना ।
आः दच्छि तक ला छि थ्व टाइटल होल्डर जुयादी । थ्व दच्छिया दुने थ्व टाइटल होल्डरया नातां छु गज्याःगु ज्या यायेगु जुइ, अले लिपा गज्याःगु ज्या यायेगु जुइ?
थ्व दच्छिया दुने जिगु जेनेरेशनया नेवाः पासापिं मार्फत नेपालभाषाया उत्थान याये मास्ति वः । थुकिया लागि नेवाः खलः कास्कीलिसे मिले जुयाः छुं ज्याझ्वः यायेगु प्लान यानाच्वना । नेवाः मिसातय्गु विकासया लागि छगू संस्था चायेकेगु नं जिं बिचाः याना च्वनागु दु ।
नेपालमण्डल डट कम स्वयादियाला स्वयासा गथे च्वं नापं थ्व नेपालमण्डल डट कमया भ्युअस्रिपंत थ्व साइतमा माध्यमं छुं धायेगु दु ला ?
नेपालमण्डल डट कम बरोबर स्वया । जितः थ्व तसकं यः । जब जिं थ्व साइटय् सकतां खँ नेवाः भासं खनी, अबले जितः तसकं गौरव व खुशीया अनुभूति जुइ । जितः विशेष यानाः थुकिया थिम व न्यूज ब्लग यः ।
नेपालमण्डलया भ्यूअर्स पासापिं, नेवाः भाय् संस्कृति व परम्परा सयेकेत जिपिंलिसे थ्व मार्फत सत्तिक्क च्वनादिसँ । नेवाः भाय् सयेका च्वंपिं न्हूगु पुस्तायात नं थुकिं ग्वहालि याइ ।
Related Stories
रश्मिता नकर्मी मिस नेवाः पोखरा ११३२More Stories Like this
बाघ भैरवया भजन म्येँया म्यूजिक भिडियो सार्वजनिक दाफा भजन म्येँ नं आः म्यूजिक भिडियोय् श्रीच्छा प्रधानं त्याकल 'मिस नेपाल वर्ल्ड २०२३' या उपाधि नेपालभाषाया न्हूगु म्युूजिक भिडियो “याकः मिसाया छेँ खः झीगु किपू देयया प्यंगः थां” सार्वजनिक मिस नेवाः जिगु लुमन्ति व अनुभव
