जि कवि मखु
अनिक शाक्य
साहित्यया सिनाज्या यायेगु झ्वलय्
प्वंगु भ्वँतय् सलंसः
आखःग्वलं भरय् जुइ
तर व आखःग्वलय्
दुवाला स्वत धाःसा
फुस्लुगु भाव सिबय्
मेगु छुं दइ मखु
उकिं जिं स्यू जि कवि मखु,
जि साहित्यकार मखु
धाःसा धाल धाइ -
जिं च्वसा न्ह्याकाच्वनाः
मसःपिनिगु न्ह्यःनय्
सःम्ह धकाः केनेत जक
जिं स्यू जि कवि मखु
अय्नं जि
आखःग्व प्वचिनाः
कविता दय्का च्वना
जिं स्यू, च्वयेगु जिगु ज्याः मखु
अय्नं जि
कवि धायेकेत
च्वसा न्ह्याकाच्वना
मात्र मसःपिनिगु न्ह्यःनय्
थःत सःम्ह धकाः केनेत,
सत्यया छाप तयाः
असत्य ब्वयेत
थुलि खँ सी धुंकाः
सायद छं दः
ब्वःबिइ मास्ति वः जुइ
जितः ब्वनेगु
त्वःते मास्ति वः जुइ
यःसा ब्वः ब्यु दः
मयःसा ब्वनेमते जिगु कविता
तर छगू खँ थ्व नं न्यं कि -
जि थज्यापिं थन
जि हे जक मखु
मेपि नं दु
उमिसं थ्व खँ
सुलातःगु जक खः
धाःसा धाल धाइ -
आखःग्वः द्वचिनाः
कवि जुइत स्वइपिं
जि थज्यापिं कवि जक मखु
थन, बाल अधिकार,
मानव अधिकार हनन् याइपिं
अधिकार वक्ता त नं दु,
अधर्मया किचलय् म्वानाच्वंपिं
धर्मगुरु त नं दु,
स्वम्ह प्यम्ह जहान दुगु छेँय्
थातय् लाका न्ह्याके मफुसां
देय् न्ह्याकेत स्वयाच्वंपिं नेता त नं दु ।।
Related Stories
मतिना जकं जूगु खः ला !! बुनाः मतिना जि थः हे ज्वी फुMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
