छेँ थुनाः लँ तब्या याःगु विरोधय् संघर्ष
येँ (झीगु स्वनिगः)
सरकारं सतक तःब्या यायेगु नितिं धकाः छेँ थुनेगु ज्या न्ह्याकूगु विरोधय् उपत्यका सडक विस्तार पीडित संघर्ष समितिया आह्वानय् स्वनिगःया थाय् थासय् च्वंपिं मनूत म्हिगः आइतवाःनिसें सतकय् क्वहाः वःगु दु ।
न्हापांगु संघर्षया ज्याझ्वः कथं म्हिगः महाराजगञ्ज व सात दोवाटोपाखं ब्यागलं ब्यागलं विरोध मोटरसाइकल ¥याली पिकाःगु खः । उगु मोटरसाइकल र्याली थाय् थासय् थ्यंकाः विरोध सभा तकं याःगु खः । अथे हे थौं सोमवाः प्रधानमन्त्रीया निवास वालुवाटारय् धर्ना बिइगु ज्याझ्वः तयातःगु दु ।
अथे हे कन्हय् स्वनिगःया मूमू लँपु बल्खु, कलंकी, सातदोवाटो, महाराजगञ्ज लगायतया थासय् सतकय् च्वनाः हे प्रदर्शन यायेगु जुइ धकाः उपत्यका सडक विस्तार पीडित संघर्ष समितिं धाःगु दु । उगु संघर्ष समितिया कजि न्हुच्छेबहादुर श्रेष्ठं बियादीगु जानकारी कथं कंस बुधवाः सतक विस्तारया झ्वलय् पीडित परिवारया भ्वछि भ्वछि हे मनूत सतकय् च्वनाः प्रदर्शन यायेगु ज्याझ्वः तयातःगु दु ।
उखुन्हु कलंकी, बल्खु, टंकेश्वर, सात दोवाटो, महाराजगञ्ज नापं थाय् थासय् प्रदर्शन जुइ धकाः धाःगु दु । थौंया संघीय गणतन्त्र नेपालय् नं पञ्चायतकालया कानुनयात लागू यायेगु धकाः येँ महानगरपालिकापाखें नक्सा पास यानाः दनातःगु छेँ तकं थुनाः नेवाःतय्त विस्थापित यायेत्यंगुलिं बाध्य जुयाः थःपिं संघर्षय् क्वहां वयेमाःगु खः धकाः वय्कलं धयादीगु दु । यदि थःपिनिगु माग पूरा मयात धाःसा निगूगु चरणया आन्दोलन अझ अप्वः सशक्त कथं न्ह्याकेत थःपिं तयार दु धकाः तकं श्रेष्ठं धयादिल । लच्छि न्ह्यःनिसें स्थानीय सरोकारवालातय्गु विरोधया कारणं दिनाच्वंगु लाजिम्पाटया छेँ थुनेगु ज्या वंगु शनिवाःनिसें सरकारं न्ह्याकेवं संघर्ष समिति सतक आन्दोलनय् क्वहां वःगु खः ।
