मन्त्रीपाखें आन्दोलनया घोषणा

येँ (झीगु स्वनिगः)

सरकारं दयेकूगु राज्य पुनर्संरचना सुझाव आयोगं तयार याःगु प्रतिवेदनया विरोधय् वाणिज्य तथा आपूर्तिमन्त्री लेखराज भट्टं आन्दोलनया घोषणा यानादीगु दु ।
ये“य् म्हिगः शनिवाः साक्षात्कार ज्याझ्वलय् न्वंवासें मन्त्री भट्टं सेती महाकाली राष्ट्रिय मुक्ति मोर्चाया हैसियतं धकाः आन्दोलनया घोषणा यानादीगु खः । आन्दोलनया ज्याझ्वः कथं थौं सोमवाः राज्य पुनर्संरचना समितिया बहुमत व अल्पमतं तयार याःगु निगू हे प्रतिवेदन च्याकेगु, कन्हय् प्रशासनया मार्फत प्रधानमन्त्री, सभामुख व संवैधानिक समितियात ज्ञापन पौ बिइगु अथे हे २७ गते न्हिनय् चक्का जाम व मसाल जुलुस यायेगु व माघ २७ गते सुदुरपश्चिम क्षेत्र बन्दया आह्वान याःगु दु ।
सेती, महाकाली व भेरी कर्णालीयात दुथ्याकाः खस प्रदेश दयेकेमाःगु माग यानाः अथे आन्दोलनया घोषणा याःगु खः ।

थःपिनिगु माग पूरा मजुल धाःसा अझ सशक्त कथं आन्दोलन यायेगु जुइ धकाः तकं आपूर्ति मन्त्री भट्टं ख्याच्वः बियादीगु दु । अथे मन्त्रीं हे आन्दोलनया घोषणा यानादीगुलिं मनूत अजूचाःगु दु ।