लाजिम्पाटय् हानं छेँ थुन
येँ (झीगु स्वनिगः)
सतक विस्तारया नामय् छुं न्हि न्ह्यः दिकातःगु म्हिगः सुथय् आपुलुखं डोजर चलय् यानाः छेँ पःखाः थुंगु दु । स्थानिय जनतां प्रतिरोध यायेवं प्रहरी प्रशासनं लाठी चार्ज यानाः तःम्हहे घाःपा यानाव्यूगु दु । एकीकृत नेवाः राष्ट्रिय मुक्ति मोर्चाया येँ जिल्ला समितिया न्वकु राजेन्द्र महर्जन व नेवाः ल्याय्म्ह जन स्वयम सेवा २९ वडाया इन्चार्ज प्रदिप लोचन लगायत व्यक्तित घाःपा जूगु खः । सुथसिया ४ ताः इलय् डोजर चलय् यानाः खानी विभाग व होटल एम्वेसीडरया न्ह्यःनेया पःखाः नं थुंगु दु ।
थ्व ज्या ११ वजेतिनि दिकूगु खः । प्रतिकारय् कुहां वःपिं मध्ये खुम्हय्सित ज्वना यंकूगु खः । स्थानिय छेँ थुनेगु ज्या वन्द याकेत माओवादी पोलिटव्यूरोया दुजः हितमान शाक्य, नेपाली कांग्रेसया नरहरि आचार्य, मानव अधिकारवादी नेता पद्मरत्न तुलाधर लगायत व्यक्तिपिं वालुवाटारय् प्रधानमन्त्री डा. भट्टराईयात नापलानाःआःयात छेँ थुनेगु ज्या दिकेमाःगु माग यायेवं आःयात उगु ज्या दिकूगु दु ।
