३३ प्रतिशत छुट सुयात ?

पेट्रोलियम पदार्थया भाः थकायेवं भाः लितकायेमाःगु माग न्ह्यःनेतयाः आन्दोलनय् कुहां वयाच्वंपिं विद्यार्थीत लिच्यूगु दु । थकाःगु भाः स्वयाः छुं भचा क्वकायेवं झिस्वंगू विद्यार्थीतय्गु आन्दोलन मदीवं सरकारं विद्यार्थीतनाप सहलह ब्याकाः विद्यार्थी व गरिव जनतायात ग्यास व मचिकनय् ३३ प्रतिशत छुट वीगु खँ क्वछ्यूगु खः । थःपिन्त व विपन्न जनतायात ३३ प्रतिशत छुट वीवं विद्यार्थीतय्गु आन्दोलन नं द्यूगु दु व निगूगु चरणकथं घोषित संघर्षया ज्याझ्वःत फुक्कं लितकाःगु दु । वाणिज्य व आपूर्ति मन्त्रीं कार्यविधि दयेकाः ज्या यायेगु व गथ्य व दु गुगु प्रकृयां इन्धनय् नं छुट वीफै धयागु खँय् कार्यविधि दयेकाः न्ह्याः वनेगु धयादीगु दु ।

राष्ट्रिय योजना आयोगया दुजःया संयोजकत्व दयेकूगु कार्यदलय् दुजःकथं वाणिज्य मन्त्रालयया ल्यू छ्याञ्जे, अर्थमन्त्रालयया ल्यू छ्याञ्जे, गृह मन्त्रालयया ल्यू छ्याञ्जे कृषि मन्त्रालयया ल्यू छ्याञ्जे, उद्योग मन्त्रालयया ल्यू छ्याञ्जे व नेपाल राष्ट्र बैंकया अधिकृत च्वनीसा नेपाल आयल निगमया महाप्रवन्धक दुजः छ्याञ्जे जुयाः कार्यदलया ज्याझ्वः न्ह्याकीगु जूगु दु । कार्यदलं वइगु जेठ महिनातक्कया कार्ययोजना दयेकाः ग्यास व मचिकनय् छुट वीगु ज्याझ्वः न्ह्याकी । थ्व वाहेक कार्यदलं अनुगमन पुचःयात नं ग्वाहालि याइ । गृहमन्त्रालय व उद्योग मन्त्रालय् पदाधिकारीत च्वनाः दयेकातःगु अनुगमन समितिं ग्यास वितरण व मचिकं वितरणया लिसे लिसे चिकं मीगु ज्याय् नं भाःकथं अनुगमन याइगु जूगु दु । थुकिं चिकंया चुहावत, नियन्त्रण, गलत ज्या याइपिन्त कारवाही याइ ।

विद्यार्थीतय्त छुट ३३ प्रतिशत बीवं थुकी गलत व्यक्तिपिसं विद्यार्थीया नामय् छुट काइगु यक्कों सम्भावना दु । थौं कन्हय् यातायातय् दुगु ३३ प्रतिशतया सहुलियत गैर विद्यार्थीतय्सं कयावयाच्वंगु दु । ५०–१०० ध्यबा नकाः स्कूल कजेलं विद्यार्थी परिचय पत्र इनावःगु दु । यातायात सहुलियत विद्यार्थीतय्सं जक मखु थौं कन्हय् २५ प्रतिशतं मयाक गैर विद्यार्थीतय्सं विद्यार्थी परिचय पत्र घानातःगु अवस्थाय् छु ग्यास व मचिकं नं उज्वःपिन्त ३३ प्रतिशत सहुलियत बीगु ला ? थुकी नं स्थानिय मनूत स्वयाः पिनें वयाः थन जागीर नयाच्वंपिं २५ प्रतिशतया मनूतय्सं विद्यार्थी परिचय पत्र घाना जूगु दु । विद्यार्थीतय्सं ३३ प्रतिशत छुट बी न्ह्यः थुज्वःगु नक्कली विद्यार्थी परिचयपत्रतय्गु नि अध्ययन अनुसन्धान जुइमाः, विद्यार्थीतय्त छुट बी बलय् गैर विद्यार्थीतय्सं कयावयाच्वंगु गलत फाइदायात पनेफयेमाः । मखुसा थुकिया सदुपयोग स्वया दुरुपयोग अप्वः जुइगु निश्चित खनेदु ।

मचिकं व ग्यासय् ३३ प्रतिशत छुट बीन्ह्यः थ्व नक्कली विद्यार्थी परिचयपत्रयात कयाः छानबिन यायेफयेमाः । ध्यबा भचा कयाः न्ह्यःनेलाःपिन्त विद्यार्थी परिचय पत्र इनेगु ज्या दिके मफुसा थ्व ३३ प्रतिशतया छुट विद्यार्थीतय्सं म्हो व गलत मनस्थितिया गलत मनूतय्सं अप्वः छ्यली । स्कूल कलेजय् ब्वनाच्वंपिं धात्थेंपिं विद्यार्थीतय्त जक विद्यार्थी परिचय पत्र वियाः मखुगु व नक्कली परिचयपत्रत रद् याकेगु पाखेनं ज्याझ्वः न्ह्याकेमाः । न्हूगु परिचय पत्र इनेगुपाखे पलाः छीमाः । मनूतय्गु ल्हातय् लानाच्वंगु द्वलंद्वः नक्कली परिचय पत्रयात यथावत तयाः छुटया ज्याझ्वः न्ह्याके मज्यू । दक्को पुलांगु परिचयपत्र रद्द याकाः नियमित अवस्थाय् न्हूगु परिचय पत्र इनाः जक छुटया ज्याझ्वः न्ह्याकेगु बांलाइ ।

More Stories Like this