नेवाः पत्रकार राष्ट्रिय दबूया नितिं ९१ म्हेसिया ग्वसाः खलः

येँ (झीगु स्वनिगः)

नेवाःतय्गु राष्ट्रिय संगठन नेवाः देय् दबूया संयोजनय् नेवाः संचारकःमि दबूया ग्वसालय् म्हिगः शनिवाः नेवाः संचारकःमितय्गु बृहत्त भेलां ९१ म्ह नेवाः पत्रकारत दुथ्याकाः नेवाः पत्रकार राष्ट्रिय दबू मू ग्वसाः खलः नीस्वंगु दु । उगु भेलां वइगु चैत्र ४ गते ये“य् देय्न्यंकंया नेवाः पत्रकारतय्त सहभागी याकाः नेवाः पत्रकार राष्ट्रिय दबूया न्हापांगु सम्मेलन यायेगु धकाः निर्णय याःगु दु । उगु भेलां नेवाः पत्रकार राष्ट्रिय दबू न्हापांगु सम्मेलन मू ग्वसाः खलःया २१ म्हेसिया छगू सचिवालय् नं गठन याःगु दु ।

कजि श्रीकृष्ण महर्जन जुयादीगु उगु पुचलय् दुजःकथं उदेन न्हूसाय्मि (सन्ध्या टाइम्स), रमेश मानन्धर (किप्स एफ एम), ज्ञानकुमार महर्जन (नेवाः एफ एम), नृपेन्द्रलाल श्रेष्ठ लिपि पौ), राज्यलक्ष्मी शाक्य (गोरखा एफ एम), अस्मीत मल्ल (नेपालमण्डल डट कम), ज्ञानकुमार महर्जन (नेवाः एफ एम), शिला साय्मि (सन्ध्या टाइम्स), प्रेरणा शाक्य (झीगु स्वनिगः), किचःमान ज्यापु (लाय्कू बाःछिपौ), सुगतरत्न सिन्दुराकार (देशय् मरु झ्याः वाःपौ), के के मानन्धर (सगरमाथा टेलिभिजन), सुरज वीर बज्राचार्य (सगरमाथा एफ एम), राजेन्द्र शाक्य (उज्यालो एफ एम), जुनिबज्र बज्राचार्य (न्हूजः एफ एम), रचना श्रेष्ठ (रेडियो नेपाल), नातिकाजी महर्जन (गोरखापत्र), मन्जु बज्राचार्य (कान्तिपुर एफ एम), महेश श्रेष्ठ (नेवाः पत्रकार दबू धरान) व उपेन्द्र प्रधान (दोल्खा)यात ल्यःगु दु । श्रीकृष्ण महर्जनया सभापतित्वय् जूगु उगु भेलाय् मूपाहां नेवाः देय् दबूया नायः नरेश ताम्रकार जुयादीगु खः । ज्याझ्वलय् बरिष्ठ पत्रकार रमेशकाजी स्थापित, सन्ध्या टाइम्सया सम्पादक सुरेश मानन्धर, पत्रकारपिं नातिकाजी महर्जन, महेश श्रेष्ठ, उपेन्द्र प्रधान नापं मेमेपिन्सं नं नेवाः पत्रकारत छप्प“ छधी जुयाः थःपिनिगु हक अधिकारया नितिं न्ह्याः वनेमाः धकाः बः बियादीगु खः ।

अथेहे झीगु स्वनिगः न्हिपौया सम्पादक अमीररत्न ताम्रकारं पत्रकार सचिर महर्जनयात छुं दिं न्ह्यः जक आक्रमण याःगु घटनायात कयाः आक्रमणकारीयात ज्वनाः कारवाही याकेगु नितिं संचारकःमितय्सं पहल यायेमाःगु ख“ न्ह्यथनादीगु खःसा वय्कःया प्रस्तावयात कयाः नेवाः संचारकःमितय्सं माःगु कथं भूमिका म्हितेगु नं ख“ जूगु खः । राज्य लक्ष्मी शाक्यं न्ह्याकादीगु उगु ज्याझ्वलय् उदेन न्हूसाय्मि, प्रेरणा शाक्य, रमेश मानन्धर, ज्ञानकुमार महर्जन व शिला साय्मिं नेवाः पत्रकार राष्ट्रिय दबूया नितिं न्ह्यब्वयादीगु थीथी कथंया प्रस्तावयात तकं पारित याःगु खः ।