अपाङ जनसेनापाखें आन्दोलनया ख्याच्वः

‘बाध्यात्मक परिस्थितिं स्वेच्छिक अवकास ल्ययागु खः’

येँ (झीगु स्वनिगः)

अपाङ लडाकुतय्सं थःपिनिगु माग पूरा मजुल धाःसा आन्दोलन यायेगु जुइ धकाः ख्याच्वः ब्यूगु दु । नवलपरासीइ च्वंपिं जनसेना चौथौ डिभिजन अन्तर्गतया घाःपाः जूपिं व पूर्ण रुपं अशक्त अपाङ लडाकुतय्सं थःपिनिगु नितिं न्हूगु योजना महल धाःसा आन्दोलनय् क्वाहां वयेगु ख्याच्वः ब्यूगु दु । इमिसं ख्याच्वः बियादिल ‘बाध्यात्मक परिस्थितिया कारणं स्वेच्छिक अवकास ल्ययागु खः ।’ माग पूरा मजूतले शिविर त्वःतेगु जुइमखु धकाः उगु डिभिजनय् दुम्ह लडाकु नापं जनक्रान्ति घाःपाः व अपाङ योद्धा संघया पश्चिमाञ्चल क्षेत्रीय दुजः टीकाराम घर्तीमगरं धयादिल । चौथो डिभिजन मुख्यालयसहित सहायक शिविरत नवलपरासीया हात्तिखोर, जर्गाह व रुपन्देहीया सैनामैनाय् यानाः पूर्ण रुपं अशक्त थ्यंमथ्यं १८ म्ह व थीथी किसिमया ५ सय लडाकु अपाङ दुगु जानकारी वय्कलं बियादिल । इपिं लडाकुतय्सं घाःपाः जूपिन्त उपचार, पूर्णरुपय् अशक्त अपाङ लडाकुयात गास, बास व कपास, कृत्रिम अपाङ, सम्मानपत्र, अपाङ लडाकुया काय् म्ह्याय्पिन्त निःशुल्क शिक्षा व थःलाःपिन्त रोजगारीया व्यवस्था यायेमाःगु माग याःगु दु ।

चौथो डिभिजन मुख्य शिविरया देवीलाल घर्तीं अपाङ व पूर्णरुपं अशक्त आपाङ जूपिं लडाकुया मागप्रति सरकार गम्भीर जुइमाः धयादीगु दु । अथे हे थःपिनिगु माग पूरा मजुल धाःसा सेना समायोजन प्रक्रिया दिकेगु ख्याच्वः तकं डिभिजन कम्पनी सहकमाण्डर रुपश्री परियारं धयादीगु दु । लडाकु रेखदेख, समायोजन व पुनःस्थापना सम्वन्धी विशेष समिति मातहतया सचिवालयपाखें अवकास ल्यःपिं लडाकुयात बिदाइ यायेगु ज्या म्हिगः शनिवाः नं न्ह्याकूगु दु । बिदाई सुरु जुइ ल्यंदनिगु न्यागू मध्ये स्वंगु शिविरया स्वैच्छिक अवकास ल्यःपिं लडाकुयात ध्यबा बिइगु ज्या न्ह्याकूगु दु । चितवनया तेस्रो डिभिजन व नवलपरासीया चौथो डिभिजनय् धाःसा वंगु शुक्रवाःनिसें हे ध्यबा इनेगु ज्या न्ह्याकूगु खः ।