लक्ष्मीदास मानन्धर अभिनन्दन व्यवस्थापन समिति स्वन

येँ (झीगु स्वनिगः)

नेवाः संघसंस्था व नेपालभाषा ख्यःया थीथी संस्थातय्गु प्रतिनिधिमूलक भेलां वंगु सोमवाः लक्ष्मीदास मानन्धर निक्वःगु ज्याःजंक्वया लसताय् अभिनन्दन व्यवस्थापन समिति नीस्वंगु दु । नेपालभाषा सेवीलिसें समाजसेवी भाजु मानन्धरया ८४ दँ क्यनेत्यंगु लसताय् थ्वहे वइगु फागुन २४ गते जंक्व ज्याझ्वः यायेत्यंगु खः । थ्वहे लसताय् वय्कलं नेपालभाषा व नेवाःतय्गु क्षेत्रय् आःतक यानावयाच्वंगु ज्याखँयात लुमंकुसें अभिनन्दन व्यवस्थापन समिति नीस्वंगु खः ।

झिंखुम्ह दुजः दुगु उगु व्यवस्थापन समितिइ छसीकथं संयोजक नरेशवीर शाक्य च्वनादीगु दुसा सहसंयोजकय् सुजीव बज्राचार्य च्वनादीगु दु । दुजलय् ई. मोहनकृष्ण डंगोल, सुवर्ण शाक्य, डा. चुन्दा बज्राचार्य, धर्मशोभा तुलाधर, रघुवीरभक्त मानन्धर, अष्टमुनि गुभाजु, के.बी. घःजु, मंगला कारञ्जित, सुतित्रमान शाक्य, राजेश शाक्य, गौतम मानन्धर, प्रविण मानन्धर, ज्ञानकाजी शाक्य, श्याम मानन्धर, कृष्णबहादुर मानन्धर, मोहनकृष्ण मानन्धर, अरुण मानन्धर, जुजुभाइ मानन्धर व महेन्द्र मानन्धर च्वनादीगु दु । थुगु अभिनन्दन समितिया बृहत मुँज्या याकनं हे च्वनाः अभिनन्दन ज्याझ्वःया नितिं तयारी यायेत्यंगु दु । भाषासेवी मानन्धरया निक्वःगु जंक्वया लसताय् स्मारिका व वहलं सियातःगु सिक्का पिथनेत्यंगु दु ।