मरुइ खड्ग सिद्धि प्याखं ल्हुइकीगु

येँ (झीगु स्वनिगः)

मरुत्वाः पुचः (टोल सुधार समिति)या ग्वसालय् खड्ग सिद्धि जात्राया झिनिदँ क्यंगु लसताय् वइगु माघ २० व २१ गते शुक्रवाः व शनिवाः मरु दबुली प्याखं ल्हुइकीगु जूगु दु । थुकिया नितिं ग्वसाः खलः व मरुत्वाःया सकल त्वाःबाःपिंत द्यः काःवनेत शुक्रवाः सनिलया न्याताः इलय् मरुइ मुनेत नं ग्वसाः खलकं इनाप यानातःगु दु ।
झिंनिदँय् छक्वः थःगु निश्चित थाय्या बाहेक मेमेगु थाय् थासय् नं थुगु प्याखं ल्हुइकीगु खँ भरत मालीं कनादीगु दु । मेमेबलय् अष्टमातृका जक प्याखं ल्हुइकीगुली झिंनिदँय् छक्वः न्यतया अजिमा द्यःया गण प्याखनय् माःद्यः पिहांवइथें थुगु खड्ग सिद्धि प्याखनय् नं स्वेत भैरव प्याखं पिकाइगु तर थ्व अनिवार्य मजुसे सुनां सुनां इच्छा याःसां जक स्वेत भरवया प्याखं ल्हुइकीगु याइ ।

तर थुकिया नितिं ब्यागलं कोत पुजा, वसः वहःया किकिंपा न्यापा, अंगू निसें कयाः नीप्यंगः हेंखें व हेँया बलि बीगु याइ । खड्ग सिद्धिया थुगु गण प्याखं ल्हुइकेगु जात्रा वइगु मेगु न्यालाति वनीगु मालीया बिचाः दु ।