सहमतिया बिन्दुइ थ्यनेमाःगु दु — भण्डारी

नेपालगञ्ज (झीगु स्वनिगः)

नेकपा (एमाले) या न्वकु विद्यादेवी भण्डारीं दलीय सहमतिया आधारय् राष्ट्रिय सहमतीय सरकारया नेतृत्व वर्तमान प्रधानमन्त्री डा. बाबुराम भट्टराईं यायेफइगु धयादीगु दु ।
प्रेस चौतारी बाँकें बुधबाः ग्वसाः ग्वःगु छगू पत्रकार सम्मेलनय् वय्कलं धयादी — ‘शान्ति व संविधान देय्या प्रमुख विषय जूगुलिं उकियात लिछ्यायेत नं राष्ट्रिय सहमतीय सरकार माःगु दु ।’ वर्तमान सरकारया कार्यशैलीं फुक्क नेपाली जनताया जीवन कष्टकर जुयाः वनाच्वंगु प्रतिक्रिया बियादिसें वय्कलं जनतायात नापं यंकेमपूmगु सरकारं नैतिकताया आधारय् राजीनामा बिइमाःगु माग यानादिल ।

पत्रकारतपाखें न्यंगु न्ह्यसःया लिसलय् पूर्व रक्षामन्त्री भण्डारीं देशय् ‘गृहयुद्ध व राजनीतिक दुर्घटना’ या अफवाह न्ह्याकीगु राजनीतिया नालायक पात्र खः धयादिल । वय्कःया थप धापू खः — ‘क्वःछ्यूगु ईया अवधिदुने संविधान पिकायेगु बाहेक दलतलिसे मेमेगु विकल्प मदुगु तितो यथार्थ मनन् यानाः सहमतिया बिन्दुइ दलत थ्यंकेमाःगु धयादिल ।