‘स्वंगू दलपाखें संविधान निर्माणय् सहमति चूलाकेगु प्रतिबद्धता’
येँ (झीगु स्वनिगः)
संविधान सभाय् प्रतिनिधित्व याइगु स्वीछगू राजनीतिक दलया शीर्ष नेतातय्गु विहीवाः च्वंगु बैठकय् नेतातय्सं शान्ति, संविधान व सरकारया ज्या कारबाहीया बारे बिचाः तःसां नं छु नं निर्णय जूगु मदु । सिंहदरबारय् जूगु उगु बैठकय् शान्ति व संविधानयात क्वःछीत राष्ट्रिय सहमतिया सरकार दयेकेमाः धइगु प्रस्ताव एकीकृत नेकपा (माओवादी) या नायः पुष्पकमल दाहालं तयादीगु व उकिया हे बारे दलया नेतातय्सं थःथःगु बिचाः प्वंकादीगु बैठकलिपा नेपाल परिवार दलया नायः एकनाथ ढकालं जानकारी बियादीगु खः । बैठकय् प्रधानमन्त्रीं शुक्रबाःनिसें माओवादी लडाकुया बिदाइ प्रक्रिया न्ह्याइगु जानकारी बियादीगु व संविधान निर्माणय् सहमति चूलाकेगु प्रतिबद्धता तःधंगु स्वंगू दलया नेतां प्वंकादीगु सभामुख सुवास नेम्बाङं धयादिल ।
बैठकय् सरकारं याःगु जनसत्ताया लिखतयात वैधानिकता बीगु निर्णय लित कायेमाः धकाः फुक्क दलया नेतां बह ब्यूगु नेपाली कांग्रेस संसदीय दलया नेता रामचन्द्र पौडेलं धयादिल । वय्कलं प्रधानमन्त्रीं विपक्षी दलपाखें सरकार क्वःथलेगु व दयेकेगु कासा जुयाच्वंगुलिं ज्या यायेत ज्यामछिनाच्वंगु धयादीगु न्ह्यःथनादिसें कांग्रेसया प्राथमिकता सत्ता प्राप्ति मखु शान्ति व संविधान जक जूगु थःम्हं लिसः बियागु जानकारी बियादिल । दलया नेतातय्सं न्वंवायेगु ज्या अझ नं क्वःमचानीगुलिं शनिबाः हाकनं सुथसिया झिंछताः इलय् बैठक च्वनेगु जानकारी नं ब्यूगु दु ।
