येँया चागलय् व यलया बालकुमारीइ ग्यास नियन्त्रण : प्रहरीया हस्तक्षेप

येँ (झीगु स्वनिगः)

स्थानीय बजारय् जा थुइगु ग्यास मदयाः हाहाकार जुयाच्वंगु इलय् स्थानीय जनतां ये“या चागल व यलया बालकुमारीइ ग्यास ज्वनावःगु गाडी नियन्त्रणय् कायेवं प्रहरीं हस्तक्षेप याःगु दु । स्थानीयवासी, एकीकृत माओवादीया स्थानीय कमिटी व एकीकृत नेवाः राष्ट्रिय मुक्ति मोर्चाया कार्यकर्तातय्गु सक्रियताय् म्हिगः बिहिवाः थनया ताहचः चागलय् ग्यासया सिलण्डर तयाहःगु गाडी नियन्त्रणय् काःगु दु । ४८ गः सिलण्डर तयाहःगु बा २ च ७११० नम्बरया गाडी उगु कथं स्थानीयवासीं नियन्त्रणय् काःगु खः । उगु गाडीइ ग्यास बाबा, सूर्य नाप नापं मेमेगु ग्यास दुगु खः ।

कालो बजार याइपिन्थाय् यंकेत्यंगु शंका यानाः उगु गाडी अथे नियन्त्रणय् काःगु खः । ग्यास गाडीया चालकयाके न्यनेकने याःगु इलय् नं लिसः स्पष्ट बिइ मफयेवं स्थानीयवासीं शंका याःगु खः । स्थानीय जनता, एकीकृत माओवादीया पार्टी व नेवाः मोर्चाया सक्रियताय् नियन्त्रय् काःगु लागाय् हे ग्यास इनेत प्रहरी प्रशासनया ग्वहालि कायेगु धकाः खबर यानाः प्रहरीयात सःतूसां प्रहरी वयाः अन अखतं ग्यास नियन्त्रणय् काःपिन्त हे हस्तक्षेप याःगु खः । ग्यास तयातःगु गाडी नं प्रहरीं हे यंकूगु दु । प्रहरीया लाठीचार्जय् लानाः तःम्ह हे मनूत घाःपाः जूगु दु ।

प्रहरीया ज्यादतीं राजीव कर्माचार्य नापं मेमेपिं घाःपाः जूगु खः धकाः स्थानीयवासीं जानकारी ब्यूगु दु । प्रहरीया सहायक निरिक्षक विष्णुप्रसाद ढुंगाना, निरिक्षक संजय रिजालपिन्सं म्वायेकं म्वायेकं शक्ति प्रयोग याःगु खः धकाः नं स्थानीयवासीं जानकारी ब्यूगु दु । जनसेवाया इन्सपेक्टर हेम थापां लाइनय् तयाः अन हे ग्यास इनेगु व्यवस्था यायेत स्वःसां बालाजुया डिएसपिं ग्यासया गाडी बिस्कयंकूगु खः । म्हिगः विहिवाः हे यलया बालकुमारीइ विद्यार्थी व स्थानीयवासीं बाबा ग्यासया डिपोपाखें ये“य् मिइगु नितिं यंकेत्यंगु ग्यास दुगु निगः गाडी नियन्त्रणय् कयाः अन हे इनेत कुतः यायेवं प्रहरीं बल प्रयोग याःगु दु ।

अथे प्रहरीं हस्तक्षेप यायेवं उगु लागाय् तनाब ब्वलंगु खः । तनाबलिपा बाबा ग्यास कम्पनीया अधिकारी व स्थानीयवासीया दथुइ वार्ता तकं जूगु खः । डिपोय् ग्यास काःवंम्ह जयकुमारी डिस्ट्रिब्युटरया संचालक गोविन्द थापाया धापू कथं स्थानीयवासीयात न्हापां ग्यास बियाः जक मेपिन्त बीगु सहमति जूगु दु ।