साढे ४ अर्ब मब्यूसा राजीनामा : मन्त्री भट्ट

येँ (झीगु स्वनिगः)

वाणिज्य तथा आपूर्ति मन्त्री लेखराज भट्टं सरकारपाखें साढे चार अर्ब तका मबिल धाःसा राजीनामा बिइगु जुइ धकाः घोषणा यानादीगु दु । म्हिगः बिहिवाः ये“य् जूगु साक्षात्कार ज्याझ्वलय् न्वंवासें मन्त्री भट्टं अथे धयादीगु खः । वय्कलं धयादिल ‘पेट्रोलियम अभावयात पूर्ति यायेगु नितिं आयल निगमयात कम्ति नं साढे ४ अर्ब तका ध्यबाः माःगु दु । उलि ध्यबा सरकारं मबिल धाःसा राजीनामा बिइगु जुइ ।
उलि ध्यबा बिल धाःसा निवाःया दुने आपूर्ति सहज जुइ ।’ पेट्रोलियम पदार्थया समस्या समाधानया नितिं म्हिगः विहिवाः हे प्रधानमन्त्री डा. बाबुराम भट्टराईयाके साढे ४ अर्ब तका माग यानागु दु धकाः नं वय्कलं जानकारी बियादिल ।

मन्त्री भट्टं भारतीय आयल कर्पोरिसनयात ध्यबा बिइ मफयाः ग्या“सया अभाव जूगु खः धकाः नं कनादिल । वय्कलं धयादिल सरकारं २५ करोड तका बिइगु निर्णय याःगु दु छु व चिकं न्यायेत ब्यूगु ला कि जाकि न्यायेत ? आयल निगमयात साढे ४ अर्ब तका बिल धाःसा स्वंगू चरण यानाः सुधारया ज्या न्ह्याकेफै धकाः धयादिल । आःया अवस्थाय् कृतिम अभावया अन्त्यया नितिं उच्च स्तरीय अनुगमन पुचः याकनं हे गठन जुइ धकाः नं दावी यानादिल । ज्याझ्वलय् पेट्रोलियम ढुवानी व्यवसायी एसोसिएसनया उपाध्यक्ष सिद्धीलाल श्रेष्ठं डिजेल ग्यास नापंया पदार्थय् तःधंगु होटल व उद्येगीतसें भ्याट लित काये खनीगु तर जनताया छ्यनय् धाःसा भारत बियाच्वन धकाः दावी यानादीगु दु । उकिं जनतायात भ्याटया छुट बिइमाः धकाः नं वय्कलं माग यानादिल । उगु ज्याझ्वलय् ग्यास बिक्रेता महासंघया महासचिव महेश्वरलाल श्रेष्ठं ग्यासय् जुइगु कालोबजारी नियन्त्रण यायेत ग्यासय् भ्याट छुट बिइमाः धयादिल । कम्पनीपाखें हे गास सुचुकेगु ज्या जुयाच्वंगु दु धयादिसें वय्कलं कम्पनी धनी जुइगु जनतायात भार कुबिकीगु तत्काल हे बन्द यायेमाः धकाः माग यानादीगु दु ।