पेट्रोलियम पदार्थ अभावं सतक निर्माणय् पंगः
ख्वप (झीगु स्वनिगः)
तीनकुने – सूर्यविनायक खुगू लेन सतकखण्ड अन्तर्गत नेपाल सरकारया जिम्माय् दुगु निगू लेन सर्भिस ट्र्याक सतक निर्माण पेट्रोलियम पदार्थया अभावया कारण पंगः जूगु दु । गुंगू दशमलव झिगू किलोमिटरया खुगू लेन सतक मध्ये जापान सरकारं निर्माण याःगु प्यंगू लेन सतकया निर्माण क्वचाःसां नं सर्भिस ट्र्याक निर्माण पूमवनाः स्थानीयबासी लिसे पेट्रोल पम्प सञ्चालकं समस्या फयेमाःगु धासें विरोध यायेवं लच्छि न्ह्यः निर्माण ज्या न्ह्याःगु सर्भिस ट्र्याक निर्माण हाकनं दीगु दु । सवारी न्ह्याइगु मुख्य प्यंगू लेनलिसे सरकारया जिम्माय् दुगु निगू लेन सर्भिस ट्र्याक निर्माण यायेमाःगु जूसां नं सरकारं बजेट मब्यूगु धासें आयोजनां सर्भिस ट्र्याक निर्माण ताःहाकःगु ईतक्क बन्द याःगु खः ।
आयोजनाया इञ्जिनियर कृष्णबहादुर थापां बजेट अभाव व वर्षाया कारण ताःहाकःगु ईतक्क निर्माण जुइमफुगु खुगू लेन सतक अन्तर्गतया निगू लेन सर्भिस ट्र्याक सतक निर्माण न्ह्याकूसां नं आःतक्क पेट्रोलियम पदार्थया अभावया कारण ज्या दिनाच्वंगु धयादिल । जडीबुटीनिसें सूर्यविनायकतक्कया सर्भिस ट्र्याकय् ग्राभेलिङ यानाः वंगु मंसिरतक्क कालोपत्रे यायेधुंकीगु जानकारी बियाः वयाच्वंगु आयोजनां लच्छि न्ह्यःनिसें ग्राभेल यायेगु व सतक सम्म यायेगु ज्या यानाः वयाच्वंसां नं निवाः न्ह्यःनिसें पेट्रोलियम पदार्थया अभावया कारण क्यनाः आयोजनां ज्या दीकूगु खः । सरकारया कूल पीगू करोडया लागतय् सर्भिस ट्र्याक निर्माण याःसां नं गबलें ग्राभेलया अभाव व गबलें वर्षा शुरु जूगु त्वहः तयाः वयाच्वंगु आयोजनां आः पेट्रोलियम पदार्थ सहज जुइवं हे ज्या न्ह्याकीगु जानकारी ब्यूगु खः ।
आयोजनाया इञ्जिनियर थापां धयादी — ‘पेट्रोलियम पदार्थया अभावं छुं ई थुखे ज्या दीगु खः, पेट्रोलियम पदार्थ मालाच्वनागु दु, दयेवं हाकनं ज्या न्ह्याकेगु जुइ ।’
मध्यपुर थिमिया पूर्व नगर उपप्रमुख मुरारीप्रसाद आचार्यं धाःसा आयोजनाया पदाधिकारी भ्रष्टाचारय् लानाः ज्या लिबाकाः वयाच्वंगु व थीथी इलय् थीथी त्वहः तयाः वयाच्वंगु द्वपं बियादिल । छक्वःपतिकं जनदवाब बियाः नं सर्भिस ट्र्याक निर्माणय् लिबाकाःगु कारण स्थानीयतय्त समस्या लाःगु लिसे छेँय् वनेत सतक मजुयाः आपालं चाहिलेमाःगु बाध्यता वःगु दु, वय्कलं धयादी – आः नं थीथी बहानाय् ज्या दीसा स्थानीयबासीं आयोजनाविरुद्ध आन्दोलन याइ । प्यंगू लेन सतकय् सवारी साधन न्ह्याइगु तर सतक जवंखवंया बस्तीइ वनेमफइगु जूगुलिं बस्तीइ वये वनेत लिसे पेट्रोल पम्प दुहांवनेगु नितिं सर्भिस ट्र्याक छ्यलेगु कथं यानाः उगु सतक निर्माण यायेमाःगु खः ।
न्हापा थें हे सतकया न्ह्याग्गु थासं नं बस्ती वा मेमेगु क्षेत्र दुहांवनेफइगु जूसां नं खुगू लेन सतक निर्माणलिपा निश्चित थाय्पाखें जक जवंखवं वये वनेफइगु जूगुलिं प्यंगू लेन सतकया निख्यरं छगू – छगू लेन यानाः निगू लेनया सर्भिस ट्र्याक निर्माण यायेत्यंगु खः । सर्भिस ट्र्याकय् याइगु कालोपत्रे ज्या धाःसा जापान सरकारं निर्माण यानाः ब्यूगु प्यंगू लेन सतक थेंज्याःगु धिसिमलाइगु आयोजनां जानकारी ब्यूगु खः ।
