म्वानाः सीगु कि सिनाः म्वायेगु

– श्री मन रारायण

मधेसवादी दलतमध्ये दकले पुलांगु व अनुशासित संगठन अले निष्ठावान कार्यकर्तातय्गु संगठन धाइगु सद्भावना पार्टी हानं तज्याःगु दु । न्हापाथें थुगसी नं संसदीय दलं मार्फत थुगु पार्टी तज्याःगु दु । संविधानसभा निर्वाचनय् प्रत्यक्षं प्यम्ह व समानुपातिकं न्याम्ह यानाः गुम्ह सभासदत दुगु खः । थौंया संस्थापन पक्षपाखे निम्ह निर्वाचित व छम्ह समानुपातिक पाखेया यानाः स्वम्ह सभासद्त जक ल्यंदनि । पार्टीया लिपांगु विभाजनया प्रभाव कार्यकर्तापक्तिइ मलाइगु निश्चित दु । थुगु विभाजन नाप छगू ज्वलन्त न्ह्यसः छक्वः हानं दनावःगु दु । छु पार्टी अध्यक्ष व मन्त्री जुइतं थुलि अप्वः लालायित छाय् दु ? मधेसवादीया अर्थ नेपाली भाषीयात तथानाम ब्वहवीगु, जाति, ध्यबा व कट्टिया आधारय् चुनाव त्याकेगु, मन्त्रीपद कायेगु व स्वंगू प्यंगू पुस्तातक्कया नितिं ध्यबा मुंकेगु जक खः ? मधेसवादी नेतात म्वानाः सीगु लाकि सिनाः नं म्वायेगु छाय् अमर जुइत मस्वःगु ?

नेपाल सद्भावना पार्टीया संस्थापन नायः गजेन्द्र नारायण सिंहया झिंछगूगु पूण्य तिथिस पार्टीया केन्द्रीय कार्यालयय् ग्वसाः ग्वःगु ज्याझ्वलय् उगु पार्टीया सह नायः व सभासद् लक्ष्मणलाल कर्णं छगू न्ह्याइपूगु लुमन्ति न्यंकल । ०५२–५३ सालपाखेया खँ खः, गजेन्द्र नारायण अवलेया आपूर्ति मन्त्री खः, मधेसवादी नेता मन्त्री जुइमज्यू व मन्त्री हे जुइफैमखु धकाः छगू मान्यता नं व्याप्त दुगु खः अवले । वयकः मन्त्री जूगु अप्वःसित मयःगु खः । अवले नं पार्टी समाजवादी जनता दल व नेसपा (आर) स विभाजित जूगु खः । गजेन्द्र नारायण सिंह वीरगञ्ज वंगु इलय् लक्ष्मणलाल कर्णं वइत अस्वस्थ अवस्थाय् दुम्ह रामजनम तिवारीया स्वास्थ्य न्यंनेत इनाप यात । वयकः नेता नवायेत मग्याःम्ह मनू खः । गजेन्द्र नारायण सिंहया ख्वालय् स्वयेवं तमं मि जुयाः दुःख ल्वाक ज्याःगु सलं व्यंङ्गयात “छु खः गजेन्द्र, छला वेदानन्द झा जूवन । ०१५ सालय् वेदानन्द झा तराईया कांग्रेस अध्यक्ष जूवलय् रामजनम पार्टीया मू छ्याञ्जे खः । ०६७ सालय् जुजु महेन्द्रं पञ्चायत हयेधुंकाः वेदानन्दं पञ्चायती व्यवस्थायात समर्थन यात । मन्त्रीया पद नं काल । जवकि रामजनम तिवारी निर्वाचन व हिरासतया सम्झना यायेमाल । वेदानन्दं पार्टी त्वःताः मन्त्री जूवंम्ह मधेसवादीया पर्याय जूवंगु खः ।

रामजनम ०४० सालंनिसें हे सद्भावना परिषद् व पार्टीइ लगय् जूगु कारण वयकःया आक्रोश अस्वभाविक मखु । गजेन्द्रनारायण थःनं रक्तचाप व मधुमेंहया ल्वगि जूगु कारण तत्कालला तमं मि जुल, तर लिपा संयमित व शान्त जुयाः विनम्र पूर्वक लिसः विल, बाबा वेदानन्द थौं नं म्वानाच्वंगु दु, तर व सिनाच्वंगु (सीम्ह थें) तर जि सिनाः नं सीमखु । अर्थात सिना नं जि अमर जुइ । छाय् धाःसा थौं नं गजेन्द्र नारायणया नां सम्मानं कायेगु याः । वयकः पटक पटक मन्त्री जुल, तर निजी सम्पत्ति ममुंकल । न राजधानी थें छगु इञ्च जग्गा न्यात नत बैंक व्यालेन्स । वयकः फुक्ककथं पार्टीप्रति समर्पित खः । न्ह्यसः दनावइ, गजेन्द्र नारायणथें सिनाः नं म्वायेगु झ्वलय् थःयात थनेगु सुं मधेसवादी नेता छाय् तयार मदु ? कि नेतृत्व मधेसं जन्मय् हे याये मफुत ? मधेसवादी नेता बाबा रामजनक जुइ छाय् मयः ? सकलें वेदानन्द झाया लँपुइ वनेत स्वयाच्वन छाय् ? ध्यबा कमय् यायेत व उकियाहे लिधँसाय् राजनीति यायेगु अले इतिहास च्वके वीगु, सम्भव जूसा म्वाःम्वाकं सालिक दयेकेगु शैलीं मधेसी नेतृत्वया बेइज्जती जुयाच्वंगु दु । तर नं सुनां थुकियात महसूस यानाच्वंगु खनेमदु ।

राजधानीं प्रकाशित छगू वाःपतिइ नेपाली भाषी पत्रकारं मधेसी नेताया आचरण प्रति कठोर व्यङ्ग याःगु दु । गजेन्द्र नारायण म्वातले कांग्रेस, कम्युनिष्ट व पञ्च नेतातय्सं वयकःयात ख्वयेके फक्को ख्वयेकल । तर वयकः मदयेधुंकाः वयकःया पार्टीयात कब्जा यायेत वा ध्वस्त यायेत कांग्रेस, कम्युनिष्ट, राप्रपा प्यख्यरंया मधेसवादीत उकी दुहां वन । वयकःया जहानयात नेता यानाः देखावटी ज्या यात । वयकःयात नं ख्वयेकल ।
अर्थशास्त्रय् छगू धापू दु, “नक्कली नोटया अप्वः छ्यलाबुलां गवले गवलें सक्कली नोट नं वजारं गायव जूवनी ।” आः राजनीतिइ अथ्यहे जुयाच्वंगु दु । मालेया संस्थापक नेता राधाकृष्ण मैनाली व सिपी मैनाली एमालेय् मन्ह्य, म्वाःतले पुष्पलालयात गद्दार व कांग्रेसया न्हेप्पं धयाजुल । कृष्णप्रसाद भट्टराई अन्तिम इलय् थःगु पार्टीयातहे त्वःतेमाल । अप्वः यानाः फुक्क धैथें राजनीतिक दलय् थुगु प्रवृत्ति हावी दु । स्वस्थ प्रतिस्पर्धा यानाः न्ह्यःने वनेगु पल्सा थःगु प्रतिद्वन्द्वीया तुति त्वाथलाः न्ह्यःने वनेगु प्रवृत्ति हावी दु ।

न्हूगु मधेसवादी दलत झंझं दयनीय अवस्थाय् दु । दकले पुलांगु मधेसवादी दलया इतिहासयात अन्त्य यानाः कलंकित व दूषित यानाः थःगु इतिहास थःम्हं च्वयेत स्वयाच्वंगु दु । इतिहास धयागु विषय छन्हुं छलां व दच्छिं तयार जुइमखु । सुयागुं इतिहास वर्षोंया घटनातय्गु संग्रह जुइ । राजनीतिक दलत व नेतातय्के बांलाःगु योगदान वीगु, देश व जनताया हितय् न्ह्यथने बहःगु ज्या याइम्हसिगु इतिहास जक लिपां तकं च्वनी । मधेसय् गजेन्द्रनारायण व रामजनम तिवारी जक उज्वःपिं व्यक्ति जुल गुम्हय्सिगु नां सम्मानं काइ । जनकपुरय् डा. लक्ष्मीनारायण झाया नां दकले न्ह्यःने लाइ । देशया वर्तमान राजनीतिइ मधेसवादी दलया म्हसीका सत्तालोलुप, पदया नितिं पार्टी तछ्याइगु व ध्यबा कमय् यायेगु उदेश्य ज्वनाच्वंपिं दु । गुगु विकृतियात चीकेत मधेसवादी दलत तयार मदु । छम्हय्स्यां मेम्हसिगु आगं प्वलेगु, स्यायेगु व ततःधंगु दलया चाकरी यायेगुली ई छ्याइपिं अप्वः दु । मधेसया समस्या गुलि नं समाधान जूगु दु, इपिं फुक्कं अस्थायी प्रकृतिया दु । कन्हय् समाप्त नं जुइफु । नागरिकताया विषयलय् औचित्य ल्होनेगु यानाहःगु दु । मेमेगु विषयत नं अदालतया कारण व्यवहारय् लागू जुइफयाच्वंगु मदु । मधेसवादी दल संविधान सभाय् वनाः गुलि सकृय जुइमाःगु खः, जुइफूगु मदु । राज्य पुनर्संरचना आयोगय् नं मधेसवादी दलं छम्ह गैर मधेसीयातहे छ्वल । राजदूत नियुक्तिइ नं मधेसीत नगण्य दु ।

पार्टीं सभासद् दयेकी, नेता दयेकी, थ्व सामान्य खँ खः । तर आःया सभासद्ं पार्टी दयेकाच्वंगु दु, गुगु तसकं दुर्भाग्य खः । निर्वाचनय् जनताया समर्थन व विश्वास त्याकाः वःपिं प्रतिनिधि पुनः जनताया विश्वास मकासे दथ्वीहे न्हूगु राजनीतिक निर्णय कायेगु जनदिशाया घोर अपमान खः । थ्व राजनीतिक नैतिकताया न्ह्यसः नं खः । तर छाय् थ्व वुद्धि मवःगु नेतातय्के ? मधेसवादी दल मधेसया न्ह्यसलय् इमानदार मजुल धाःसा वेदानन्दया ताःहाकःगु धलखय् थुमिगु नां दुथ्याइगु पक्का नं दु । मधेसवादी नेतात, म्वानाः सीगु लाकि सिनाः म्वायेगु (अमर जुइगु) निर्णय यायेफयेमाः ।

More Stories Like this