प्रधानमन्त्रीं मेगु राष्ट्रघात यात

एकीकृत नेकपा (माओवादी) या न्वकु व वर्तमान प्रधानमन्त्री डा. बाबुराम भट्टराईपाखें यक्कों राहतया ज्याझ्वःत पितःहःगु व देशयात न्ह्यःने यंकेत माःमाःगु ज्यातनं न्ह्याका यंकी धयागु खँय् आः वयाः जनतां विश्वास यायेगु त्वःता हयाच्वंगु दु । शान्ति व संविधानया नितिं पार्टी एकता जूसां प्रधानमन्त्री डा. भट्टराईं नेपाःया हित जुइगु ज्याय् नं भारतया न्हू दिल्लीया समर्थन व निर्देशन कयाः जक ज्या याइगु खनेदया वःगु दु । नकितिनि चीनया प्रधानमन्त्री वेन जियावाकोया नेपाः भ्रमणया इलय् हे ल्होंगु नेपाः हित सम्वन्धी खँयात न्हू दिल्लीया निर्देशनया लिधँसाय् प्रधानमन्त्री डा. बाबुराम नकारात्मक लिसः बीवं छगू गतिलाःगु व अत्यावश्यक ज्या मजुइगु जूगु दु ।
खँ छु धाःसा नेपाः लोड सेडिङ्गया मारं देशवासीत वाक्क दिक्क जुयाच्वंगु व देशय् दुने दुगु सीमित उद्योग धन्धातनं चौपड जुयाच्वंगु इलय् चीन सरकारपाखें जलविद्युत उत्पादनया क्षमता व सम्भावनायात कयाः अध्ययन अनुसन्धान यायेगु प्रस्तावयात प्रधानमन्त्री डा. भट्टराईं अस्वीकार यानाव्यूगु दु । थुकिं मित्र राष्ट्र चीन सरकार तंचाःगु जक मखु, वल्कि प्रधानमन्त्री डा. भट्टराई नेपाःया हित सम्वन्धी खँय् न्ह्याः वनेगु पल्सा भारतया न्हू दिल्लीया निर्देशनकथं न्ह्याः वनेत इच्छुक व तत्पर जुयाच्वंगु खँ स्पष्ट यानाव्यूगु दु ।

नेपाः विश्वया जलविद्युत उत्पादनया क्षमताया मिखाकुलिं निगूगु देय् धकाः धयावःगु दु । नेपालय् ८३००० मेगावाट विद्युत उत्पादन यायेगु क्षमता दु धकाः धयावःगु खः । थ्व खँ आधिकारिक मखुसां मात्रै जलश्रोत विद् हरिमान श्रेष्ठया दँवदँ न्ह्यः पिएचडी शोधया झ्वलय् न्ह्यथंगु खँ खः । नेपाली जनता व मेमेगु क्षेत्रं नं थुकियात हे अपुष्ट हे थजु छम्ह व्यक्तिया थोसिसय् दावा याःगु खँयात कयाः धायेगु व मानय् यायेगु यानावःगु दु । तर यथार्थय् थ्व अनुमान जक खः आधिकारिक मखुनि । अथ्य जूगुलिं मित्र राष्ट्र चीन सरकारं आधिकारीक धारणा दयेकेगु उदेश्यं नेपाःया वास्तविक जलविद्युत उत्पादनया क्षमता गुलि खः धयागु सीकेत हे अध्ययनया प्रस्ताव तःगु खः । प्रधानमन्त्री डा. भट्टराईया चाहना व इच्छाया आधारय् विश्वास यानाः आर्थिक क्रान्तिया नारा वियावःगु खँया आधारय् नं चीन सरकारं थुगु प्रस्ताव न्ह्यःने हःगु खः । चीनिया प्रधानमन्त्रीया पुस ३० गते न्याघौया नेपाः भ्रमणया इलय् थ्वहे प्रस्तावयात मूर्तरुप वीगु कथं थुया स्वन्हुप्यन्हु न्ह्यः लिखित रुपं प्रस्ताव नेपाःयात लःल्हाःगु खः । डा. भट्टराइपाखें याउँक हे प्रस्ताव स्वीकार याइगु मनोस्थिति पुस २४ गते चिनिया राजदूत याङ्ग हौलनं नेपाल सरकारयात लिखित प्रस्ताव लःल्हाःगु खः ।

नेपाःया हित सम्वन्धी थुज्वःगु खँयात सहर्ष स्वीकार यायेगु पल्सा सुंनापहे सहलह मव्याकुसे भारतया निर्देशनय् तप्यंकहे अस्वीकार यानाव्यूगु खः । थ्व ज्या धयागु विप्पा सम्झौताथें हे प्रधानमन्त्री डा. भट्टराईया देशघाटी ज्या जूगु खँ विद्यतय्सं धयाहःगु दु । विद्यतय्गु छगू अनुमानकथं नेपालय् जलविद्युतया कुल उत्पादन क्षमता ८३००० मेगावाट मखुसे १ लख ५०००० स्वयाः अप्वः दु । नेपाःया खुसितय्गु संख्या व अन बाहा वनाच्वंगु लःया मात्रायात कयाः थुगुकथंया अनुमान याःगु खः । तर गुलि आवश्यक व महत्वपूर्ण विषयया अध्ययन अनुसन्धान याकाः देशयात फाइदा जुइगु खँय् भारतया कपाः स्यागु व वहे ल्वय् डा. भट्टराइयात नं थ्यूगु खँ मनूत अजू चायाच्वंगु खनेदु । थुज्वःगु राष्ट्रघाती ज्या भट्टराईं छाय् यात ? न्ह्यसः थनाहःगु दु ।

More Stories Like this