संस्थापन पक्षं पेलेयात : देउवा
येँ (झीगु स्वनिगः)
प्रमुख प्रतिपक्ष दल नेपाली कांग्रेस दुने शीर्ष नेतातय्गु दथुइ आन्तरिक विवाद झन झन तच्वया वयाच्वंगु इलय् वरिष्ठ नेता शेरबहादुर देउवां थः सहमतिया नितिं लचिलो जुयागु अवस्थाय् पार्टीया संस्थापन पक्षं अझ अप्वः पेलेयात धकाः धयादीगु दु । विनोद देव स्मृति प्रतिष्ठानं म्हिगः ये“य् ग्वसाःग्वःगु ज्याझ्वलय् न्वंवासें नेता देउवां अथे धयादीगु खः । वय्कलं धयादिल ‘रामचन्द्रजीयात उपसभापति व कृष्णप्रसाद सिटौलाजीयात महामन्त्री दयेकूगु इलय् सहयोग यानागु ला ख हे खः, अःखतं फुक्क सहमति खतम जुल ।’
कांग्रेसया बरिष्ठ नेता देउवां शान्ति व संविधान निर्माण अन्यौलताय् लानाच्वंगु अवस्थाय् मुलुकया नेतृत्व यायेगु इलय् पार्टीया विवादय् अलमल जुयाः च्वनेगु दुर्भाग्यपूर्ण खः धकाः नं धयादिल । थः न्ह्याबलें नं पार्टी एकताया पषय् दु धकाः धयादिसें नेता देउवां नेतृत्वया हे कारणं यानाः सहमति जुइ मफयाच्वंगु खः धकाः द्वपं बियादिल । वय्कलं दलतय्गु दथुइ न्हय्गू बु“दाया सहमति कार्यान्वयन मजुयाः स्थायी शान्ति, संविधान निर्माण छु जुइगु खः धकाः जनतां चिउताः प्वंकाच्वंगुदु धकाः नं धयादिल । छुं दिं न्ह्यः जक नेता देउवां थःगु पक्षधरया नेतातय्गु गोप्य भेला यानादीगु खः ।
ज्याझ्वलय् नेपाली कांग्रेसया मेम्ह नेता अर्जुन नरसिंह केसीं पार्टीदुने एकता कायम यायेत लोकतान्त्रिक पक्षधरत छप्प“ जुयाः वनेमाःगु आवश्यकता दु धकाः धयादिल ।
