‘कांग्रेस—एमाले संघीयता विरोधी’

येँ (झीगु स्वनिगः)

उपप्रधान नापं गृहमन्त्री विजयकुमार गच्छेदारं नेपाली कांग्रेस व एमाले संघीयता व मधेस विरोधी शक्ति खः धकाः द्वपं बियादीगु दु । विराटनगरया विमानस्थलय् म्हिगः बुधवाः संचारकःमितलिसे ख“ल्हायेगु झ्वलय् मन्त्री गच्छेदारं अथे धयादीगु खः । वय्कलं राज्य पुनर्संरचना उच्चस्तरीय आयोगं लःल्हाःगु प्रतिवेदनयात अस्वीकार यायेगु धकाः नेपाली कांग्रेस व एमालें धःगु धैगु संघीयता नापं मधेस विरोधी चरित्र क्यंगु खः धकाः टिप्पणी यानादिल ।

मधेसी जनअधिकार फोरम लोकतान्त्रिकया नायः तकं जुयादीम्ह गच्छेदारं राज्य पुनर्संरचना आयोगया बहुमत सदस्यतय्सं तयार यानाः सरकारयात लःल्हाःगु प्रतिवेदन सहि व वस्तुवादी जूगु दावी नं यानादिल । बहुमत सदस्यतय्सं तयार याःगु प्रतिवेदन मुलुकया फुक्क क्षेत्र, जनजाति, भाषाभाषि व समुदायया भावना दुथ्यानाच्वंगु दु धकाः मन्त्री गच्छेदारं धयादिल । वय्कलं कांग्रेसपाखें प्रतिनिधित्व याःपिं निम्ह सदस्यत रमेश ढुंगेल व सावित्री गुरुङ अले एमालेपाखें प्रतिनिधित्व याःम्ह सर्वराज खड्कां थःथःगु पार्टीया निर्देशनय् अवस्तुवादी विचाः तयाः फरक मत तयेगु ज्या यात धकाः नं धयादिल । अल्पमत सदस्यतसें लःल्हाःगु फरकमतं मुलुकयात पञ्चायती शासनपाखे लित यंकेत्यंगु द्वपं तकं मन्त्री गच्छेदारं धयादिल । वय्कलं कांग्रेस व एमालेया अल्पमत सदस्यतय्सं लःल्हाःगु प्रतिवेदन धैगु पञ्चायती शैलीया खः धकाः धयादिल । मधेसी नेता गच्छेदारं धयादिल ‘कांग्रेस व एमाले मधेसीया घोर विरोधी जूगुलिं फरक मत प्रस्तूत याकूगु खः । आयोगं प्रतिवेदन पेश याये न्ह्यः हे अल्पमत सदस्यतसें फरक मत प्रस्तूत याकूगु बांलाःगु ख“ मखु ।’ वय्कलं बहुमत सदस्यतसें पेश याःगु संघीयताया खाका सरकारयात मन्य जुइगु कथंया दु धकाः न्ह्यथसें हिमाल, पहाड व मधेस—तराई फुक्कसित स्वायत्त राज्य अनुभव जुइगु कथंया प्रतिवेदन बहुमत सदस्यतय्सं तयार यात धयादिल ।

मन्त्री गच्छेदारं धयादिल ‘आयोगया बहुमत सदस्यतसें ब्यूगु प्रतिवेदनय् पहिचान व सामथ्र्यतायात दुथ्याकातःगु दु । उगु प्रतिवेदन सरकारया नितिं यक्व हे मान्य जुइगु कथंया दु ।’ मधेसी मोर्चा व एकीकृत माओवादीया स्वायत्ता प्रदेशया अवधारणाय् समानता दुगु ख“ स्पष्टयासें धयादिल ‘बहुमत सदस्यया प्रतिवेदन व्यवहारिक जू, न्हूगु चिज लागू यायेगु इलय् सुयात मान्य व सुयात अमान्य जुइगु स्वाभाविक हे खः ।’