फेसबुकया मू नेपाःया बजेट स्वयां २० गुणा अप्वः

नां जाःगु सोसल नेटवर्क साइट फेसबुकं बजारय् थःगु शेयर पित बिइत स्वीकृतिया लागि न्हापांगु पलाः ल्व्हंगु दु । थुकिया लागि फेसबुकं थौं आरंभिक सार्वजनिक निर्गम (IPO) या लागि निवेदन दर्ता याःगु दु । न्हापांगु खुसिइ फेसबुकं शेयर मियाः ५ अर्ब अमेरिकी डलर मुंकेगु लक्ष्य दयेकूगु दु ।

थौं दर्ता जूगु निवेदनपाखें फेसबुक बारे थीथी खँ सार्वजनिक जूगु दु ।

फेसबुकया मू १०० अर्ब अमेरिकी डलर
फेसबुकया थौंकन्हय्ंया मू एक सय अर्ब अमेरिकी डलर बराबर थ्यंगु खँ विज्ञतय्‌सं धाःगु दु । थथे धयागु फेसबुकया मू नेपाःया वंगु दँया वार्षिक बजेट स्वयां २० गुणा मल्याक अप्वः खः । नेपाःया लागि २०११/२०१२ या लागि वार्षिक बजेट पाँच अर्ब अमेरिकी डलर खः ।

फेसबुकया नाफा १ अर्ब डलर
थौं दर्ता जूगु निवेदन कथं फेसबुकं सन् २०११ दुने एक अर्ब डलर नाफा याःगु दु । निवेदनय् न्ह्यथना तःकथं ९९ करोड डलर वा १.०४ अर्ब आदि मखुकि पाय्‌छि १ अर्ब डलर हे कमे याःगु धकाः धाःगु दु । धात्थें फेसबुकं एक डलर हे उखेथुखे मजुइक १ अर्ब डलर कमे याःगु खः अथवा स्टेटमेन्टया लागि मिले याःगु खः थ्व धाःसा सकसिया लागि न्ह्यसः जूगु दु ।

जकरवर्गया तलव ७ लाख ८३ हजार डलर
निवेदन कथं फेसबुया संस्थापक व प्रमुख कार्यकारी अधिकृत मार्क जकरवर्गं वंगु दँय् मू तलव ४८३,३३३ अमेरिकी डलर व २२०,५०० अमेरिकी डलर वोनस नाप यानाः ७८३,५२९ अमेरिकी डलर तलव काःगु खः । थ्व बाहेक जकरवर्गं वंगु दँय् प्राइभेट प्लेन गयाः यात्रा यायेत जक थ्यंमथ्यं ७ लाख अमेरिकी डलर खर्च याःगु दु ।

दक्कले यक्व तलव ३ करोड डलर
फेसबुकं वंगु दँय् दक्कले यक्व तलव फेसबुकया प्रमुख व्यवस्थापन अधिकृत (COO) सेरिल स्यान्डवर्गयात ३ करोड ८ लाख ७० हजार ब्यूगु दु । थुकिइ मू तलव २९५,८३३ अमेरिकी डलर ८५,१३३ वोनस व ३०,४९१,६१३ बराबरया शेरय ब्यूगु खः ।

फेसबुक युजर ८४ करोड, न्हिं २५ करोड पाः किपा अपलोड
फेसबुकया युजरतय् ल्याः थौंकन्हय् ८४ करोड ५० लाख दुसा न्हिच्छिया २५ करोड पाः किपा अपलोड जुइगु व न्हिच्छिया २ अर्ब ७० करोड लाइक व कमेन्ट जुइगु जुयाच्वंगु दु ।

More Stories Like this