सरकार शान्ति व संविधान निर्माणप्रति प्रतिबद्घ – प्रधानमन्त्री भट्टराई

ख्वप (झीगु स्वनिगः)

प्रधानमन्त्री डा. बाबुराम भट्टराईं सरकार शान्ति व संविधान निर्माण पूवंकेत प्रतिबद्ध जुयाः न्ह्यःज्यानाच्वंगु धयादीगु दु । ख्वपया प्रमुख पर्यटकीयस्थल नगरकोटय् नीच्यासः व पीच्याक्वःगु डुक ल्होछारया लसताय् नगरकोट नाल्दुम पर्यटन विकास समितिं ग्वसाः ग्वःगु ‘नगरकोट नाल्दुम उत्सव – २०६८’ या उलेज्या यानादिसें वय्कलं जेठ १४ दुने शान्ति व संविधान क्वःचाइगु दाबी यानादिल ।

प्रधानमन्त्री डा. भट्टराईं थीथी कारणं छुं इलंनिसें दिनाच्वंगु लडाकुया बिदाई ज्याभ्mवः मंगलवाःनिसें न्ह्याःगु धयादिसें वय्कलं धयादी – ‘छुं ईनिसें प्राविधिक कारणं दिनाच्वंगु स्वेच्छिक अवकाशय् वनेमास्ते वःपिं माओवादी लडाकुया बिदाईया ज्या मंगलवाःनिसें सरकारं न्ह्यःने न्ह्याकूगु दु ।’
थुकिं शान्ति व संविधान निर्माणय् तःधंगु तिबः जुइगु दाबी यानादिसें माघ २९ गतेदुने राज्य पुनःसंरचनाया विवादित विषय नापं क्वःछीगु दाबी यानादिल । प्रधानमन्त्री भट्टराईं धयादी – ‘राज्य पुनःसंरचना आयोगं मंगलवाः प्रतिवेदन न्ह्यःब्वयेत्यंगु दु, अनलिपा माघ २९ गतेदुने फुक्क विषयदथुइ सहलह यानाः विवादित खँयात क्वःछिइ ।’
पहिचान व सामथ्र्यया आधारय् राज्य पुनःसंरचना जुइमाःगु दाबी यानादिसें वय्कलं जातीय, सांंस्कृतिक व म्हसीका नापं कायम तयाः राज्य पुनःसंरचना यायेगु न्हापा हे दलतदथुइ सहमति जुइधुंकूगु दाबी यानादिल । सरकारया मेगु मू लक्ष्य धइगु आर्थिक सम्वृद्धि दुगु न्ह्यःथनादिसें वय्कलं थुकिया नितिं छुं ई बीगु नापं धयादिल ।

वय्कलं धयादी – ‘युगौंनिसें देशय् जरा गाडय् यानाच्वंगु सामन्तवादं द्वःचिंगु फोहोरया डङ्गुरयात फु मन्तर यानाः याकनं हे वांछ्वयेगु थें जितः नं ताःगु खः तर याकनं हे वांछ्वयेत थाकूगु दु, छुं ई ब्यूसां नं थुकियात वांछ्वयाः हे त्वःतेगु जुइ ।’
पेट्रोलियम पदार्थय् जूगु मूल्यवृद्धिया विरोधया औचित्य मदुगु धयादिसें वय्कलं वंगु दँ नेपालय् न्ह्यन्यागू अर्बया पेट्रोलियम पदार्थ आयात याःगु थुगु दँ छगू खर्बया आयात जुइगु अवस्थाय् अन्तर्राष्ट्रिय क्षेत्रय् हे थुकिया भाः थहांवंगुलिं नेपालं नं थकायेमाःगु धयादिल । प्रधानमन्त्री भट्टराईं धयादी – ‘पेट्रोलियम पदार्थया मूल्य निर्धारण यायेगु ज्या जिमिगु ल्हातय् मदु, थ्व मेगु देय्या ल्हातय् दु, अथे जूगुलिं भाः कुहांवइमखु व अनुदान नं बीफइमखु ।’

सरकारं हरेक दँ पेट्रोलियम पदार्थ थिकयेक न्यानाः दंक मियाः वनेगु खःसा देय् टाट पल्टय् जुइगु धयादिसें वय्कलं थुकिइ सरकारं छु नं अनुदान मबीगु बरु विद्यार्थी व गरिब जनताया नितिं छवाःयादुने सहुलियतय् ग्यास, मचिकं लगायतय् सहुलियत बीगु ज्याभ्mवः घोषणा यायेगु तयारीइ सरकार दुगु न्ह्यःथनादिल ।