दुरुया भाः नं थकाल

पेट्रोलियम पदार्थया भाः थकाःगु विरोधय् थीथी विद्यार्थी संगठनतय्सं याना वयाच्वंगु आन्दोलन द्यूगु मदुनि लागत मू अप्वल धकाः दुग्ध विकास संस्थानं म्हिगःनिसें भाः थकाःगु दु । थकाःगु भाः कथं वाउँगु पाकेटया दुरुइ प्रतिलिटरय् स्वतका व वचूगु दुरुया पाकेटय् नितकाः थकाःगु दु । मंगलवाः निसें थकाःगु धयागु दुरुइ जक खः । निकट भविश्यय् उगु संस्थान उत्पादित वटर, चीज, मिठाइ, धौ लगायतय् नं भाः थकाइगु जूगु दु । थुया न्ह्यः वाउँगु दुरु प्रति प्याकेट (आधा लिटर)या नीत्यातका व वचूगु प्रति पाकेटया नीनितकां मिया वयाच्वंगु खः । दुग्ध विकास संस्थानया महाप्रवन्धक सिवरामप्रसाद यादवया धापूकथं दुरु उत्पादन यानाः संस्थानयात दुरु वियावयाच्वंपिं किसानतय्सं लागत अप्वः तूगुलिं किसानतय्सं दुरु उत्पादन व पशु पालनया ज्या त्वःताः विसुं वनाः मेमेगु हे पेशाय् तक्यंवंगुलिं दुरुया भाः थकायेमाःगु खः । भाः थकायेवं दुरु उत्पादन याइपिं किसानतय्त अप्वः ध्यवा बीफैगुलिं थुगु क्षेत्रं पलायन जुयाच्वंपिन्त पनेफै । थुगु कथं भाः थकायेवं किसानतय्त निताका व खुइगः ध्यवां निसें प्यतका तकं ध्यवा अप्वः वीफै । थुया न्ह्यः दुरुया भाः निगूकथं वजार भाः जुयाच्वंगु खः । प्रति लिटर ४४ तका निसें ५० तका जुयाच्वंगु खः । अथ्यहे किसानतय्त प्रति लिटर ३० तका निसें ३५ तका थ्यंगु खः । थुया न्ह्यः दुग्ध विकास संस्थानं थौं स्वया पाय्छि झिलान्ह्यः भाः थकाःगु खः ।

दुग्ध विकास संस्थानं भाः थकायेवं म्हिगः हे नेपाल उपभोक्ता महासंघं विरोध याःगु दु । महासंघया नायः शम्भु कडोरयां छगू प्रेस विज्ञप्ति पिकयाः उगुकथंया भाः दुरुया उपभोक्तातयत प्रत्यक्ष असर लाःगु दु । उपभोक्तातय्गु बबिक्वँय् त्वाथलेगु कथं अप्वयेकूगु भाः तत्काल क्वकायेत नं बहः व्यूगु दु । प्रेस वक्तव्यय् लिकुनाच्वंगु उपभोक्ता महासंघं भाः थकालकि विरोधय् छगू वक्तव्य पिकायेगु वाहेक सतक आन्दोलनय् थौं तक्क कुहां वःगु मदुनि । भाः अप्वयेकूगु लितमकाःसा आन्दोलन यायेगु, थथ्य याकेगु अथ्य यायेगु धाइ । तर व्यवहारय् उगु उपभोक्ता महासंघं भाः लितहे मकाःसां आन्दोलनया ज्याझ्वः ज्वनाः सतक क्वाकेगु ज्या याःगुहे मदुनि । थुमिगु खँ न्यनाः भाः थकाःगु लित कायेगु स्वयाः थप यायेगु ज्याझ्वःयात जक हःपाः बीगु ज्या जुयाच्वंगु दु । थुकिं यानाः भाः थकाइपिन्त ख्यायेगु ज्या उगु उपभोक्ताया विरोधं यायेफूगु खनेमदु ।

थौं कन्हय् येँया स्वनिगलय् जक ८ निसें ९ लख लिटर दुरुया माग जुयाच्वंगु दु । तर दुग्ध विकास संस्थानं धाःसा १ लख ३० द्वः लिटर दुरु वितरण यानाः वयाच्वंगु दु । देश दुने माकथं पूर्ति यायेमफयेवं भारतं कच्चा दुरु हयेगु यानाच्वंगु दु । देश दुने माक्को दुरुया उत्पादन मजुइवं भारतं दुरु हयेगु यानाच्वंगु खः । भारतं न्हिं ३००००० लिटर कच्चा दुरु आयात यानावयाच्वंगु खः । उपत्यकाय् दुने जनसंख्याय् अत्याधिक माग यात देशदुने पूर्ति यायेमफयेवं उगुकथं पिनें कच्चा दुरु हयाच्वंगु खः ।
थौं कन्हय् संस्थानं ५ करोड ध्यबाया दुरु मुंकाः मिया वयाच्वंगु दु । थुकी ६० प्रतिशत म्येयया दुरु खःसा ४० प्रतिशत साया दुरु संकलन यानावयाच्वंगु दु । तर भाः अप्वयेकाः किसानतय्त हःपाः वीगु ज्या धाःसां सर्वसाधारण जनतायात मारय् लाकूगु दु । भाः थकयाः धात्थेंला संस्थानं नेपाल आयल निगमयात हःपाः व लिधँसा व्यूगु दुसा आन्दोलित विद्यार्थीतय्त छगूकथंया हाथ्या वीत स्वःगु दु । १३ गू विद्यार्थी संगठनतय्गु आन्दोलन थुकियात नं थी वा मथी छु धायेफूगु अवस्था मदु । भाः थकयाः किसानतय्त राहत मखु, आहतहे बी । भाः थकायेगु समस्याया समाधानया सही लँपू मखु ।

More Stories Like this