११ प्रदेशया प्रस्ताव आयोगं लःल्हात

येँ (झीगु स्वनिगः)

राज्य पुनर्संरचना सुझाव आयोगं फरक मत नापं दुथ्याकाः दलिततय्गु नितिं गैर भौगोलिक प्रदेश नापं यानाः ११ प्रदेशया प्रस्ताव सहितया प्रतिवेदन म्हिगः मंगलवाः प्रधानमन्त्री डा. बाबुराम भट्टराईयात लःल्हाःगु दु । आयोगं प्रदेशया नितिं पहिचानयात प्रमुख आधार अले सामथ्र्यतायात सहायक आधार नालाः अथे प्रदेशया प्रस्ताव तयार याःगु खः । आयोगया संयोजक मदन परियारसहितया पुचलं म्हिगः अथे प्रतिवेदन लःल्हाःगु खः । अथे हे अल्पमत पक्षपाखें रमेश ढुंगेलया पक्षं ६ प्रदेशया प्रस्ताव नं लःल्हाःगु दु । ११ प्रदेशया पक्षय् संयोजक मदन परियार, माओवादीया प्रतिनिधि मल्ल के सुन्दर व स्टेला तामाङ, मधेसी मोर्चाया कृष्ण हाछेथु व सुरेन्द्र महत्तो अले एमालेया भोगेन्द्र झा नापं यानाः बहुमत दु ।

उगु बहुमतया प्रस्तावय् लिम्बुवान, किरा“त, ताम्सालिङ, नेवाः तमुवान, नारायणी, मगरात, कर्णाली—खप्तड, मिथिला—भोजपुर— कोच मधेस प्रदेश व लुम्बिनी—अबध— थारुवान प्रदेश लानाच्वंगु दुसा गैर भौगोलिक प्रदेश कथं दलिततय्गु नितिं ब्यागलं कथं नन टेरिटोरियलय् आधारय् प्रदेशया व्यवस्था यायेमाःगु ख“ न्ह्यथनातःगु दु । अथे हे अल्पमतय् लाःपिं नेपाली कांग्रेसया रमेश ढुंगेल व सावित्री गुरुङ व एमालेया सर्वराज खड्कां धाःसा भौगोलिक, सांस्कृतिक व ऐतिहासिकया आधारय् खुगू प्रदेशया प्रस्ताव तःगु दु । अल्पमतय् लाःगु उगु प्रस्तावया नां मतःसां १ निसें ६ नम्बर तक जक तयातःगु दु ।

थ्व हे दथुइ हिमाली क्षेत्रया सभासद्तसें जडान व शेर्पा प्रदेश चीकीगु विरोधय् धकाः म्हिगः सोमवाः प्रदर्शन याःगु दु । इमिसं प्रतिवेदन लःल्हाःवंपिं आयोगया दुजःतय्त सिंहदरवारय् वनेगुलिइ १ घण्टा तक अबरुद्ध जूगु खः ।
सांसद्पिं पासाङ शेर्पा, लक्की शेर्पा, आङदावा शेर्पा, जिपछिरिङ लामा नापं मेमेपिन्सं नारावाजी यानाः पंगः थनेगु ज्या याःगु खःसा प्रहरीं बल प्रयोग यानाः आयोगया दुजःतय्त सिंहदरवारय् छ्वयेगु ज्या जूगु खः ।