चिकंया भाः पूर्णत क्वकायेमाः

पेट्रोलियम पदार्थया भाः थकायेवं प्यख्यरं विरोध जुइवं सरकारं अप्वयेकूगु भाः स्वयाः छुं भचाः क्वकायेगु ज्या जुल । तर भाः पूर्णत क्वकाये माःगु माग तयाः आन्दोलनय् कुहां वयाच्वंगु झिंस्वंगू विद्यार्थीतय्गु संगठनं न्ह्याकाच्वंगु विरोधया ज्याझ्वःयात निरन्तरता वियाच्वंगु दु । वंगु आइतवाः विद्यार्थीतय्सं निगूगु चरणया संघर्षया ज्याझ्वः घोषणा याःगु दु । ज्याझ्वः कथं आयल निगम घेराउ, मन्त्री निवास घेराउ, जनतायात संघर्षय् कुहां वयेत इनाप यायेगु, सम्वन्धित निकायय् डेलिगेशन वनेगु, पेट्रोल पम्प व ग्यास डिपोय् छापा मारे यायेगु, खालीगु ग्यास सिलिण्डर ज्वनाः चुक चुकय् सभा यायेगु, व अन्तिम इलय् अर्थात २२ गते सिंहदरवार घेरे यायेगु ज्याझ्वः क्वछिना तःगु दु । ज्याझ्वः माघ १६ गते निसें २२ गते तक्क छवाःया संघर्षया ज्याझ्वः न्ह्याइ । विद्यार्थीतय्गु थुगुकथंया निगूगु चरणया ज्याझ्वःकथं सरकारं भतीचा भाः क्वकाःगुयात स्वीकार याःगु खनेमदु । सरकारं थःथत्थे भाः थकयाः थः यत्थेहे छु भाः क्वकाःसां विद्यार्थीत पूर्णरुपं भाः क्वमकाःतले लिचिलीगु खनेमदु । संघर्षया निरन्तरता वियां वनीगु खनेदु ।

भाः थकायेगु ज्याहे नाजायत खः । छगू भ्रष्टाचारया केन्द्र विन्दु जुयाच्वंगु नेपाल आयल निगमय् सुधारया ज्याझ्वः छाय् मन्ह्याकल ? घुस्याःतय्त छाय् यथावत तयातल ? आन्तरिक रुपय् छुंहे सुधार मयाकं मात्रै ५६ तका वंगु पेट्रोलयात १०७ तकां मीगु व उलिं मियाः नं स्यात धायेगु खँ स्वभाविक मजू । कर्मचारीतय्त सहुलियत वीगु, ल्याःचाःयात ट्रान्सपरेन्ट मयायेगु, लेखा परिक्षण यायेफूगु मदु । कर्मचारीत नं माक्कोयासे १५०–२०० म्ह मनूत अप्वहे दु । थुगुकथंया भद्रगोल जुयाच्वंगु निगमयात आर्थिकरुपं पारदर्सि मदु । तर सरकार थुखे पाखे वनाच्वंगु मदु । अःपूगु व सर्वसाधारण जनतायात दुःख जुइगु ज्या जक यानाच्वंगु दु । भाः थकयाः समस्याया समाधान मखु, अप्वः दयेकावीगु जक ज्या याइ ।

नेपाल आयल निगमया व्यवस्थापन पक्षयात सुधार यायेकेत धाःसा स्यायेमाली मखु, ऋण काये नं माली मखु । पेट्रोल, डिजेल, मचिकं ग्यास आदि कयाः भारतया निगमयात गुलि ध्यबा पुलेमाः धयागु साधारण जानकारी तकं नेपाल सरकार व नेपाल आयल निगमयाके मदु । चिकं मियाः आयल निगम दच्छिया २० अर्व स्वयाः अप्वः अनुदानय् वनाच्वंगु दु । थौं कन्हय् लच्छिया १ अर्व २५ करोड ध्यबा घाटाय् वनाच्वन धाइगु आयल निगमं छु जुयाः घाटाय् वनाच्वन धयागु खँहे स्पष्ट यायेफयाच्वंगु मदु । नेपाल सरकारं निगम दुनेया भ्रष्टाचार, अनियमकतता पनेत स्वःगुहे मदु । भ्रष्टाचारीतय्त कक्कु ज्वनेत स्वःगुहे मदु । जनताया नितिं दकले दुर्भाग्यया खँ ला थ्व जुयाच्वंगु दु । भाः जक थकायेगुया छुंहे औचित्यता मदु । अन्तराष्ट्रिय वजारय् प्रति व्यारेल १ सय ११ डलर तू । थौं स्वयाः प्यदँ न्ह्यः १ सय ४७ डलर तू । अवले गुलि ध्यबां मियावःगु खः । थौं छाय् भाः अप्वयेकेमाःगु ? थुकियात कयाः जक छानविन यात धाःसां निगमदुनेया जुयाच्वंगु अनेककथंया भ्रष्टाचार व अनियमिततायात मपंसे भाः जक थकायेगुया समस्या समाधान मखु । इण्डियन आयल कर्पोरेशन नाप याःगु सम्झौताप्रति नं पुनर्विचार यायेमाः । कचिगु चिकं हयाः दनीगु खःसा व नं सरकारं यायेत लिचिलेमज्यू । अथ्यहे चिकं हयेवलय् भारत व नेपाः निख्यरं कर पुलेगु यानावःगु दु । कर निख्यरं चीकेफःसा नं घाटा म्हो जक जुइ ।

भाः थकाये न्ह्यः नेपाल आयल निगम दुने जुयाच्वंगु चुहावतयात पूर्णत वन्द यायेमाः । अप्वःपिं कर्मचारीत चीकेमाः । निगम दुने व्यवस्थापन व प्रसासनिक सुधार यानाः जक भाः थकायेगु याःगु खःसा विरोध जुइमखु । तर सरकारं सर्वसाधारण जनताया बविक्वंय् त्वाथलाः आन्तरिक सुधारया ज्या छुंहे मयासे मात्रै भाः जक थकायेगु धयागु सरकारया नालायकीपन बाहेक मेगु छुंनं मखु । थकाःगु भाः पूर्णत क्वकायेहे माः । थुकिया विकल्प मदु ।

More Stories Like this