कोरिया सरकारं बुद्ध सम्वन्धि भ्रम चीकीगु
येँ (झीगु स्वनिगः)
दक्षिण कोरियाया सरकारं थःगु देशय् शैक्षिक पाठ्यक्रमय् विश्व शान्तिया अग्रदूत भगवान बुद्धया जन्म सम्वन्धी भ्रमयात सन् २०१३ निसें भिंकीगु जूगु दु । कोरियाली परराष्ट्र मन्त्रालयया छम्ह अधिकारीं सोलय् च्वंगु नेपाली राजदूतावासयात म्हिगः सोमवाः भ्रम चीकेगु जानकारी बियादीगु दु ।
सन् २०१२ या नितिं पाठ्यपुस्तक छापे जुइधुंकूगु जुयाः मेगु संस्करणनिसें उकियात भिंकेगु जुइ धकाः नं धाःगु दु । कोरियायया पाठ्य पुस्तकय् बुद्धया जन्मस्थानया बारे उल्लेख यानातःगु दु । उगु पाठ्य पुस्तकय् बुद्धया जन्म भारतय् जूगु धकाः न्ह्यथनातःगु दु । अथे हे बुद्धया जन्म जूगु धकाः नक्सा क्यनातःगुलिइ नं भारतय् हे लाकातःगु दु । अथे भ्रम भिंकेगु नितिं कोरियाली सरकारं याःगु निर्णययात दूतावासं लसकुस याःगु दु ।
वंगु अक्टोबर २४ या दिनय् बुद्धया जन्म भारतय् धकाः कोरियाय् आखः ब्वंकेगु ज्या जुयाच्वन धकाः समाचार पिहां वःगु नापं उकियात कयाः नेपाःया राजदूत कमलप्रसाद कोइरालां अनया राष्ट्रपति ली म्याङ बाकयात बुद्ध सम्वन्धी भ्रमत ब्वलंकेगु कथंया पाठ्यक्रमय् दुथ्याकातल धकाः आपत्ति प्वंकुसें पौ हे च्वयाः भिंकेत इनाप याःगु खः ।
