‘२९ गतेया दुने सहमति मजूसा इलय् हे संविधान वइमखु’

येँ (झीगु स्वनिगः)

एमालेया नायः झलनाथ खनालं माघ २९ गते तकया दुने शासकीय स्वरुप, राज्य पुनर्संरचना विषययात कयाः सहमति मजुल धाःसा क्वःछिनातःगु इलय् न्हूगु संविधान वइमखु धकाः दावी यानादीगु दु । सेती अञ्चल स्तरीय कार्यकर्ता भेलाय् म्हिगः सोमवाः न्वंवासें धनगढीइ एमालेया नायः खनालं अथे धयादीगु खः । वंगु शनिवाः जक प्रमुख दलया नेतातय् दथुइ शासकीय स्वरुप व राज्यपुनर्संरचना समितिया बारे माघ २९ गतेया दुने विवाद जुयाच्वंगु विषय ज्यंकेगु धकाः सहमति जूगु खः । उगु ज्याझ्वलय् एमालेया स्थायी समितिया दुजः केपी शर्मा ओली, न्वकु बामदेव गौतम, मूछ्याञ्जे ईश्वर पोखरेलं नेता व कार्यकर्तात छप्प“ जुयाः वन धाःसा एमाले पार्टी देय्या हे दक्ले तःधंगु पार्टी जुइ धकाः दावी यानादीगु दु ।

एमाले पार्टी थौंकन्हय् संविधानसभाय् स्वंगूगु तःधंगु पार्टी जुयाच्वंगु दु । आः संविधानसभाय् दक्ले तःधंगु पार्टी एकीकृत नेकपा (माओवादी) खःसा निगूगु थासय् नेपाली कांग्रेस जुयाच्वंगु दु ।

नेम्वाङं मधेसवादी पार्टीत तछ्यागू द्वपं

थ्व हे दथुइ स्वस्थ्यमन्त्री नापं सदभावना पार्टीया नायः राजेन्द्र महत्तों लच्छिया दुने शान्ति व संविधान निर्माणया ज्या न्ह्याः मवन धाःसा वर्तमान सरकारयात सुनां नं बचे याये फैमखु धकाः ख्याच्वः बियादीगु दु । म्हिगः सोमवाः ये“य् ग्वसाः ग्वःगु साक्षात्कार ज्याझ्वलय् न्वंवासें मन्त्री महत्तों अथे ख्याच्वः बियादीगु खः । वय्कलं आः मधेसी मोर्चां शान्ति प्रक्रिया, संविधान निर्माण, नेपाली सेनाय् मधेसी युवातय्त सामुहिक प्रवेश व समावेशी विघेयक हयेत सरकारयात लच्छिया अल्टिमेटम बियागु दु धकाः नं धयादिल । नेता महत्तों धयादिल ‘शान्ति प्रक्रिया न्ह्याः मवन धाःसा थ्व सरकार क्वःदली । सुना नं बचे यायेफैमखु । शान्ति, संविधान व मधेसया सवालय् माग पूरा मजूगुलिं मधेसी मोर्चाया हैसियतय् हे न्ह्यसः ब्वलंगु दु । मोर्चाया अस्तित्वय् न्ह्यसः ब्वलंगु दु । थ्व शान्ति व संविधानया नितिं खः कि मन्त्रीया नितिं धकाः । पार्टी तछ्यानाः दयेकागु मोर्चाया नियतय् मधेसय् नं न्ह्यसः ब्वलंगु दु । आः गुगु आज्जु तयाः मोर्चा दयेकागु खः उकियात पुष्टि जुइमाल ।’

मधेशवादी दलतय्त तछ्यायेगु नितिं संविधानसभाया नायः सुवास चन्द्र नेम्वाङ, जनशक्ति पार्टीया सहअध्यक्ष डा. प्रकासचन्द्र लोहनी व मधेसी मोर्चाया हे नेतात संलग्न दुगु द्वपं नं बियादिल । महत्तोया पार्टी छुं दिं न्ह्यः जक तज्याःगु खःसा आः वय्कःया पार्टीइ निम्ह जक सभासद्त ल्यंदनि ।