विधि व्यवहारयात छु गुकथं लागू याकेगु ?

“नेवाःत स्यन भ्वजं व खँय् ब्रम्हूत स्यन मोजं” धाइगु चलन थौं नं झीगु नेवाः समाजय् लागू हे जुयाच्वंगु दु । विधि व्यवहारया नियम फुक्क धैथें जातिगत खलः पुचःतय्सं दयेका नं तःगुहे दु । तर उकियात लागू यायेगु हिम्मत म्होहे संघ संस्था व व्यक्तियाके दु । साय्मितय्गु केन्द्रीय मानन्धर संघया अन्तर्गत यक्कों त्वाः वाः खलःयात न्ह्यःने हःगुदु । इमिगु विधि व्यवहारया नियम छुं हदय् तकं कार्यान्वयनय् वयाच्वंगु दु । थुया ल्यू ल्यू ज्यापुतय्गु विधि व्यवहार नं लागू याकेगु पाखे न्ह्यःने वनाच्वंगुहे खनेदु । स्यस्यःत थुखेपाखे उलि गम्भीर रुपं न्ह्यःने वयाच्वंगु मदु । स्यस्यः समाज नं विधि व्यवहारया खँय् वा मेमेगु खँय् सुधारात्मक ज्याझ्वःत नं उलि वियावयाच्वंगु मदु । नेवाःतय्गु संघ संस्थातय्गुहे झ्वलय् खड्गी सेवा समिति नं नियम पिकयाः लागू याकेगु प्रकृयाय् दु । गन तक्क उदाय समाजया खँ दु वंगु डेढ दशक थुखे थ्वहे विधिव्यवहारया नियम लागू याकेगु प्रकृयाय् न्ह्याः वनाच्वंगु दु ।

धात्थें धालधाःसा उदाय समाजया उदेश्यहे थुगु विधि व्यवहारया नियम दयेकेगु व उकियात पालन याकेगु नितिं दयेकूगु वा पलिस्था याःगु खः धाःसां छु पाइमखु । उदाय जाति मेमेगु जातित स्वयाः पाःगु जक मखु, विधि व्यवहारया ज्याखँ यायेवलय् नं भतीचा भ्वासि पहः क्यनेगु स्वभाव दु । कमय् यानातःगु ध्यबा थुज्वःगु इलय् फुकेत मदुसा छु यायेत कमय् यायेगु धाइपिं नं मदुगु मखु । तर खँ फुकेगुया मखु, समाजय् न्यनावनीगु नकारात्मक प्रवृत्ति व सोचयागु खः । दुम्हय्स्यां यक्को फुकल मदुम्हय्स्यां थःगु गच्छेकथं फुकी धाइगु स्वयाः दुपिसं फुकूथें, खर्चया थें मदुम्हय्स्यां नं अथ्यहे खर्च यायेमाः धयागु मानसिकतां हा कयाच्वंगु दु । तप्यंक जक सिमा गःसा उलि समस्या जुइमखु तर सीमा गयेगुया नामय् अःखतं सिमा गइगु प्रवृत्तिं यानाः समाजय् समस्या वइगु खः । थ्व समस्यां सार उदाय वर्ग जक मखु, नेवात सकल सकलं ग्रस्त दु । छुंनां छुं मखुगु, भ्वासि ज्या यातकि उकियात आलोचना यानाः उदाहरण जुइगु पल्सा ल्यूने च्वनाः कुं खिनाच्वनेमाःसां ख्वाः छपाः न्ह्यःने भिंम जुयाः तसकं बांलाः, धकाः च्वछायेगु पाखे सुंनं ल्यूने लाःगु मदु । नकतिनि छम्ह बनिया मिसा व्यूपिसं जन्ति वःपिन्त मसला प्वः जक दुगंछि अप्वः दुगु व्यूगु मखुसे, ताइ छपु, टाइपिन छपु व वटन सेट छगू नं व्यूगु यानाः भ्वासिपह क्यन । जन्ति वंपिंला लय्ताल नं जुइ, न्हयाइपुकल नं जुइ । तर थुकिं उदाय वर्गदथ्वी थथ्यहे यायेमज्यू धकाः नजिरकथं कयाः मेमेपिसं नं थथ्य यायेत वेर मदु ।

काय् मदुपिसं म्ह्याय्पिं जक दुपिसं थथ्ययात धायेत नं थुज्वःगु भ्वासि ज्या काय्पिं दुपिसं नं यायेगु याः । भो ताहितियाहे छखलः तुलाधरपिसं थः काय्या ब्याः याःवलय् छवा तक्क थीथी थासय् भ्वय् नकाः नं भ्वय् यक्कोसित सुटपिस कापः व्यूगु खँ नं सुनां मस्यूगु मखु । थुगुकथं न्ह्यागु नं जाति खलः पुचः दथ्वी विधि व्यवहारया नियम छगू समस्या, छगू हाथ्याकथं न्ह्यःने वयाच्वंगु बांलाकहे सीदु । थुकिं नेवाःतय्गु सुधारया पक्षयात कयाः गुलि नं मनूतय्सं ल्होनेगु याइ, उलिहे समस्यात थनेत मनूत लालायित हे खनेदु । कालान्तरं निसे ल्होनावयाच्वंगु थुगु समस्यायात थौं तक्क नं बांलाक सम्वोधन जूगु मदु, समाधान यायेमफूगु मदु । सरकारं नं आःला थुखेपाखे वास्ता मयासे अथ्ये त्वःतातःगु दु । थुकिया नितिं उदाय् वर्गया संघ संस्थात छथाय् च्वंथे नेवाःत सकलें छप्प छधी जुयाः थुकियात सरकारयात नं ग्वाहालि कयाः न्ह्यःने वन धाःसा असम्भव जुइमखु ।

More Stories Like this