सरकारया निर्णय कार्यान्वयन याकेत संघर्ष
येँ (झीगु स्वनिगः)
एकीकृत नेकपा (माओवादी)या १६ गू जनवर्गीय संगठनतपाखें वर्तमान सरकारया निर्णय कार्यान्वयन यायेमाः धकाः माग यानाः आन्दोलनया घोषणा याःगु दु । माओवादीं जनयुद्ध यानाच्वंगु इलय् जनसत्तां याःगु निर्णययात सरकारं बैधता बिइगु धकाः निर्णय याःगुयात लसकुस यानाः सरकारया उगु निर्णययात कयाः प्रमुख प्रतिपक्ष नेपाली कांग्रेस व एमाले नापं मेमेपिन्सं विरोध यानाः कार्यान्वयन याके मब्यूगुयात कयाः आपत्ति प्वंकुसें सरकारया निर्णय कार्यान्वयन यायेमाः धकाः माग यानाः आन्दोलनया घोषणा याःगु खः ।
म्हिगः आइतवाः ये“य् छगू पत्रकार सम्मेलन यानाः सरकारया उगु निर्णय दृढतापूर्वक कर्यान्वयन यायेमाः धकाः माओवादीया जनवर्गीय संगठनतपाखें मंकाः कथं माग याःगु दु । उगु मंकाः पत्रकार सम्मेलनय् १६ गू जनवर्गीय संगठनपाखें जनसत्तां याःगु निर्णययात मान्यता बिइगु सहमति कथं वंगु २०६३ साल असार २ गते माओवादी व ७ दलया दथुइ निर्णय जुइ धुंकूगु जुयाः उकियात लित कायेगु ज्या मयायेत माग याःगु दु । अबले हे माओवादी जनसत्तां याःगु निर्णययात मान्यता बिइगु सहमति जूगुलिं आः वयाः सरकारया उगु निर्णययात विरोध यायेगुया छुं नं औचित्य मदु धकाः नं धाःगु दु ।
माओवादीया जनवर्गीय संगठनया नेतातय्सं प्रतिपक्ष दलतय्सं जनसत्ताया निर्णययात बैधता बिइगु सरकारया निर्णयया विरोध याःगु धैगु राजनीतिक बेइमानी बाहेक मेगु छुं हे मखु धकाः धाःगु दु । इमिसं जनसत्तां याःगु निर्णययात बैधता बिइगु निर्णययात कार्यान्वयन यायेमाः धकाः माग यानाः आन्दोलन तकं घोषणा याःगु खः ।
घोषित संघर्षया ज्याझ्वः कथं थौं सोमवाः प्रमुख राजनीतिक दलया नेतातय्त जनसत्ताया निर्णयया बारे जानकारी बिइगु, माघ १७ गते छक्वलं छन्हु हे देय्न्यंकं अर्थात ७५ जिल्लाय् हे जिल्ला प्रशासन कर्यालयपाखें प्रधानमन्त्रीयात ज्ञापन पौ लःल्हायेगु, १८ गते देय्न्यंकं कोणसभा यायेगु अले १९ गते देय्न्यंकं जनप्रदर्शन याइगु जूगु दु ।
माओवादीया १६ गू जनवर्गीय संगठनतपाखें जारी याःगु मंकाः विज्ञप्तिइ अखिल नेपाल महिला संघ क्रान्तिकारीया नकिं जयपुरी घर्ति, क्रान्तिकारी पत्रकार संघया नायः महेश्वर दाहाल, अखिल नेपाल शिक्षक संघया नायः गुणराज लोहनी, अखिल क्रान्तिकारीया नायः हिमाल शर्मा, अखिल नेपाल किसान महासंघ (क्रान्तिकारी)या कार्यालय सचिव रामकुमार पौडेल लगायतपिन्सं ल्हाःचिं तयातःगु दु । न्हापांगु चरणया आन्दोलनं माग पूरा मजुल धाःसा निगूगु चरणय् सशक्त कथं आन्दोलन यायेगु जुइ धकाः नं ख्याच्वः ब्यूगु दु ।
