भाः थकाःगु विरुद्ध विद्यार्थीतय्सं मन्त्री निवास घेरे याइगु
येँ (झीगु स्वनिगः)
पेट्रोलियम पदार्थय् भाः थकाःगु विरुद्ध आन्दोलनय् क्वहां वयाच्वंगु १३ विद्यार्थी संगठनं थप आन्दोलनया ज्याझ्वः घोषणा याःगु दु । विद्यार्थीतय्सं म्हिगः आइतवाः माघ १६ गतेनिसें २३ गते तकया संघर्षया ज्याझ्वः घोषणा याःगु दु ।
विद्यार्थीतय्सं न्हू घोषणा याःगु ज्याझ्वः कथं माघ १६ गते थौं व कन्हय् भाः थकाःगु विरुद्ध सतकय् क्वहां वयेत जनतायात इनाप यायेगु, १८ गते डेलिगेशन वनेगु, १९ गते निसें २१ गते तक पेट्रोल पम्प व ग्यास डिपोय् छापा मारेयायेगु, २० गते खालीगु ग्यासया सिलिण्डर ज्वनाः चोक चोकय् सभा यायेगु, २२ गते पूच्वय् च्वंगु मन्त्री निवास घेरे यायेगु, २३ गते १२ बजेनिसें २ बजे तक सिंहदरवारय् धर्ना बिइगु जूगु दु । पेट्रोलियम पदार्थय् भाः थकाःगु यात प्यखेरं दबाव ब्यूगुलिं सरकारं छुं भच्चा भाः क्वकाःगु जूसां विद्यार्थीतय्सं पूर्ण रुपं भाः क्वमकाःतले आन्दोलन हे यानाः च्वनेगु जुइ धकाः धयादीगु दु ।
