सहमतिया नितिं २९ गते तक

येँ (झीगु स्वनिगः)

संवैधानिक समितिया आइतवाः च्वंगु बैठकय् संविधानसभाया कार्यतालिका झिंप्यन्हु तनेगु सहमति जूगु दु । संविधान सम्बन्धी बुँदाय् विवाद समाधान उपसमितिं न्ह्यब्वःगु विषयसं उगु समितिं सहलह यानाः आइतवाः तक्कयादुने निर्णय यायेगु अधिकार दुगु खः । न्हूगु संविधान निर्माणया नितिं विवाद जुयाच्वंगु विषययात कयाः माघ २९ गते तकया दुने सहमति यायेगु प्रस्ताव यानाः संविधानसभाया कार्यातालिका तकं संशोधन याःगु दु । उगु प्रस्ताव पारित यानाः विवाद जुयाच्वंगु विषययात सहमति मालेगु नितिं आः दलतय्त हाकथं १४ दिंया म्याद थप जूगु दु । म्हिगः आइतवाः च्वंगु मु“ज्याय् एकीकृत नेकपा (माओवादी)या नायः पुष्पकमल दाहाल प्रचण्डं शासकीय स्वरुप व राज्य पुनर्संरचनाया विषययात नापं यंकाः सहमितया नितिं कुतः यायेगु जुइ धकाः जानकारी बियादीगु दु ।

माओवादीया नायः प्रचण्डं धयादिल ‘आः तक राज्य पुनर्संरचना आयोगया प्रतिवेदन वइ धकाः तायेकूगु खः अले व हे कथं समाधान यायेगु कुतः यानागु खः । राज्य पुनर्संरचना आयोगं थप ईया माग यात । आः २९ गते तकया दुने शासकीय स्वरुप व राज्य पुनर्संरचनाया निगू हे विषय नाप नापं टुंगे यायेगु कुतः जुइ ।’ संविधानसभाया संवैधानिक समितिया सभापति निलाम्बर आचार्यं अन्तिम इलय् वयाःजक सहमति मालेगु दलतय्त कयाच्वंगु ल्वय्या उपचार यायेमाः धकाः धयादिल । कार्यतालिका कथं संविधान निर्माणय् खनेदुगु विवादय् सहमति मालेगु नितिं म्हिगःया मु“ज्याय् उगु कथं सहमति जूगु खः । राज्य पुनःसंरचना आयोगया प्रस्ताव मवःगु अवस्थाय् कार्यतालिका संशोधन यायेगुया विकल्प मदुगु न्ह्यःथनादिसें समितिया सभापति नीलाम्बर आचार्यं जेठ १४ गते न्ह्यः हे फुक्क ज्या क्वःचायेकेत नेतागणं प्रतिबद्धता प्वंकूगु जानकारी बियादीगु खः । वय्कःया कथं कार्यतालिका संशोधनया नितिं संविधानसभाय् इनाप यायेगु जानकारी ब्यूगु खः ।

थ्व हे दथुइ थौं सहिद दिवस खुन्हु राज्य पुनर्संरचना सुझाव आयोगं प्रधानमन्त्री डा. बाबुराम भट्टराईयात लःल्हायेगु ज्याझ्वः तयातःगु खःसां प्रधामन्त्रीया व्यस्तताया कारणं कन्हय् मंगलवाः जक प्रतिवेदन लःल्हाइगु जूगु दु ।