फ्वंकथंया भूमिका यायेत तयार : सनम
- संकिपाय् जिं मा:कथंया भूमिका यायेत तयार दु । नेपालभाषा संकिपाय् सुनां नं म्वा:मदयेक एक्सपोज याइमखु जुइ ।
- जिं उप्व: धयाथें कोरियन संकिपा स्वयेगु अय्नं जित: नेपालभाषा संकिपा नं उतिकं हे य: । 'राजमति', 'सिलु', 'पटाचारा' जित: य:गु नेपालभाषा संकिपा ख: ।
- जिं थुलि दँ दत धका: ला धायेमखु, अय्नं जिगु बुदिं मोहनीया åादशी अथे धइगु कौलाथ्व: द्वादशि खुन्हु ख: ।
- कला क्षेत्रय् स्थायित्व मदयेफु उकिं जिं कला व मेगु छगू लजगा: नापं न्ह्याका यंके ।
सुरेन्द्र तुलाधरया डि्रम प्रोजेक्ट धयात:गु संकिपा 'पानवती'या मू भूमिका अर्थात् पानवती जुया: म्हिताच्वनादीम्ह सनम शाक्यया विचा: ख: थ्व । बुंग देसय् च्वंम्ह सनम शाक्य थ:गु हे थाय्या एन्थोनी महर्जनया माफत् इमेज च्यानलं प्रशारित जुयाव:गु 'ख्वताबजि' ख्यालि टेलिसिरियलय् म्हिता: कला ख्यलय् दुहाँ झायादीम्ह नकिं मय्जु ख: । शारीरिक सौन्दर्य नापं मन नं उतिकं हे प्रभावशाली खनेदुम्ह थुम्ह नकिं मय्जुं थीथी म्यूजिक भिडियो व रवि डंगोलया नेपालभाषा संकिपा 'वल वल फसिक्वा:'स नं नकिंया भूमिका म्हितादी धुंकल । पानवती संकिपाय् म्हितेगु ह्व:ता: चूला:गु थ:गु नितिं त:धंगु अवसरया रुपय् कयादीम्ह सनमं निदर्ेशक तुलाधरं थ:पिनि अभिनय व रुपयात स्वया: 'पानवती'या नितिं ल्व:म्ह नकिं धका: ल्य:बलय् थ:त तसकं न्ह्यइपुक खँ कनादी ।
थपाय्सकं बय्बय् जुयाच्वंगु त:धंगु बजेटया संकिपाय् म्हिते खन थ्वहे जिगु नितिं त:धंगु खँ ख: । पानवतीया सुटिङ न्ह्यइपुक न्ह्यानाच्वंगु दु । अग्रज कलाकारपिं नारायणदेवी प्रधान, हृदयप्रसाद मिश्र, पल्पसा जोशींनिसें कया: सकसिनं जित: बांलाक व्यवहार यानादी । थुकिं ज्या अ:पुक अले न्ह्यइपुक यायेत ब: ब्यूगु दु । अले 'पानवती' सुटिङ युनिट नं उतिकं हे मिलनसार व सहयोगी भावना दु थुकिं नं जित: अ:पुगु महसुस जुल । 'पानवती' न्हू पुलांगु नेवा: संस्कृति तजिलजिनाप स्वा:गु बाखं दुगु संकिपा ख: । थुगु संकिपाया बाखं बांलाक थुइका: हे जिं थुकिं म्हितागु ख: । थुकिया नितिं वर्कशप नं जूगु ख: ।
निदर्ेशक सुरेन्द्र तुलाधर ला तसकं कडा याइ नि, मग्याला छि धैगु न्ह्यस:या लिसलय् धयादी, 'ग्यायेमा:गु हे छाय् ? न्हापांनिसें नापं ज्या याना वयाच्वनागु ख: । उकिं जित: अथे मता: ।'
'पानवती' संकिपापाखें थ:त त:धंगु आस दुगु खँ कनादिसें सनम शाक्यं धयादी, 'थुगु संकिपां बिस्कं पह: वयेक बांलाक बने जुइत्यंगु दु । उकिं जित: विश्वास दु थुगु संकिपां जि अझं थाहाँ वने फइ ।'जि संकिपां फ्वंकथंया भूमिका यायेत तयार दु । नेपालभाषा संकिपाय् व नं निदर्ेशक सुरेन्द्र तुलाधर थें ज्या:म्ह निदर्ेशक गलत ढंगं एक्स्पोज याइमखु धैगु पूरा भलसा दु । संकिपाय् राजेश हमालया नकिं जुया: म्हितेगु अफर व:सा समय व सन्दर्भ स्वया: ज्या यायेगु जुइ धका: धयादीम्ह 'पानवती' सनम शाक्यं थौंकन्हय्या ल्याय्म्ह पुस्तां ययेकूथें हे कोरियन संकिपा स्वयेगु यानादी । अथेहे मिलियन फस्र्ट लभ व मोमेन्ट फर मेमोरी वय्क:यात य:गु संकिपा ख: ।
अथेहे नेपालभाषा संकिपाय् वय्क:यात 'सिलु', 'राजमति', 'पटाचारा' य: हँ । पटाचारा संकिपा स्वया: मेलिना मानन्धरया अभिनयपाखें वय्क: तसकं प्रभावित जूगु खँ नं कनादी । थौंकन्हय् युनिक कलेजय् बीबीएस स्वंगूगु दँय् ब्वनाच्वंम्ह सनम शाक्यं कला ख्यलय् स्थायित्व मदयेफुगु खँयात ध्यानय् तया: कला व मेगु छगू लजगा: नापं ज्वना: वनेगु योजना दयेकादीगु दु । स्वकुमिपिं थ:पिनि ज्याया मूल्यांकन याइपिं समीक्षक ख: धासें वय्कलं थ:गु निर्माणाधीन संकिपा पानवती छगू बिस्कं धारया नेपालभाषा संकिपा पिहाँ वइबलय् स्वयादिया । संकिपाया विषय टिप्पणी यानादीत नं इनाप यानादी ।
More Stories Like this
कलाकारिताय् न्हय्न्यादँ बिके धुंकूम्ह भृगुराम श्रेष्ठ हङकङ अवार्डय् नेवा: फिल्म राजमतिनिसें किर्तिलक्ष्मीतकया यात्राय् हिसिला जिं खनाम्ह श्रीकृष्ण श्रेष्ठ चम्सुरीकथं नांजा:म्ह पल्पसा डंगोल
