येँय् जुयाच्वंगु डोजर आतंकयात कया: प्रधानमन्त्रीनाप खँ ल्हाये : प्रचण्ड
वंगु आइतवा: एकीकृत नेवा: राष्टि्रय मुक्ति मोर्चा नेपा:या ग्वसालय् 'नेपा:या राजनैतिक बिस्कं र्इ व नेवा: स्वायत्त राज्य सुनिश्चितता' विषयस छगू त:जिगु सहलह ज्याझ्व: जुल । एनेकपा (माओवादी)या नाय: प्रचण्डया मू पाहाँसुइ जूगु उगु ज्याझ्वलय् नेवा: स्वायत्त राज्य, नेवा: आन्दोलनय् व वर्तमान नेपा:या राजनीतिक विषय नापं मेमेगु खँय् नं खँ तयेगु ज्या जूगु ख: । माननीय पर्यटन राज्यमन्त्री दिलीप महर्जनया नाय:सुइ जूगु उगु ज्याझ्वलय् थ:गु नुग: खँ तयेगु झ्वलय् माओवादी अध्यक्ष प्रचण्डं थ:पिनि पार्टी आत्मनिर्णयया अधिकारसहितया स्वायत्त राज्यया पक्षय् दुगु धका: कनादिसें जातीय उत्पीडन, वर्गीय उत्पीडन, लिंगीय उत्पीडनपाखें मुक्त यायेत हे थ:पिसं थपाय्हाक:गु संघर्ष यानागु खँ कनादीगु ख: । वर्तमान स्थितिइ आत्मनिर्णयसहितया पहिचानया आधारय् बने जुइगु स्वायत्त राज्य धरापय् लानाच्वंगु व उकिं नेवा: राज्य नं खतराय् लानाच्वंगु खँ कनादिसें राज्यया मू सत्ताय् हाली मुहाली यानाच्वंपिं पुलागु सत्ताया पक्षधर मनूतय्सं थुकथंया संघीयताय् मवंसे १४ गू अञ्चल व ७५ गू जिल्लाया अवधारणाय् हे लित यंकेत षडयन्त्र यानाच्वंगु व २०४७ सालया संविधानयात हे हाकनं लित हयेगु दाउ यानाच्वंगु खँ कनादिसें थुकी नेवा:त नं सचेत जुइमा:गु खँ कनादीगु ख: । थ:गु भाषा संस्कृतिया नितिं अले हक अधिकारया नितिं ता:इलंनिसें संघर्ष यानाव:पिं नेवा: जातिं थौं थ:पिनि अधिकार धरापय् लायेत्यंगु स्थितिइ आन्दोलित जुइमा:गु खँय् नं वय्कलं ब: बियादिल ।
अथेहे थौंकन्हय् स्वनिगलय् जुयाच्वंगु लँ तब्या यायेगु नामय् छेँ थुनेगु ज्या थ:पिनि पार्टीया निति नं मखु अले थुज्व:गु छुं नं कथंया सहलह नं मजूगु धयादिसें वय्कलं पीडित नेवा:तय् खँयात ध्यानय् तसे सरकारय् वनाच्वंपिं थ: पासापिन्त थुकिया बारे सहलह यायेगु खँ नं कनादीगु ख: ।
ज्याझ्वलय् नेवा: जागरण मञ्चया संयोजक सुजीव बज्राचार्यं थ्व र्इ संविधान च्वयेगु र्इ जूगु व थ:पिं नेवा: स्वायत्त राज्यसहितया संविधान जारी जुइमा: धैगु पक्षय् दुगु खँ कनादिसें येँय् जुयाच्वंगु बुलडोजर आतंक दिकेमा:गु खँय् ब: बियादीगु ख: । ज्याझ्वलय् नेपा: राष्टि्रय पार्टीया नाय: डा. केशवमान शाक्य, नेपा: लोकतान्त्रिक नेवा: संघया नाय: केवी घ:जुनापं सभानाय: पर्यटन तथा नागरिक उड्डयन राज्यमन्त्री दिलीप महर्जनं थ:गु नुग:खँ तयादीगु ख: ।
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
