रञ्जन कोइरालालिसेया बयान
येँ (झीगु स्वनिगः)
कलाःया हत्याया द्वपनय् ज्वंम्ह सशस्त्र प्रहरी बलया प्रहरी नायब महानिरीक्षक रञ्जन कोइरालालिसे सरकारी वकिलपाखें बयान कायेगु ज्या न्ह्यानाच्वंगु नेपाल प्रहरीं जानकारी ब्यूगु दु । प्रनामनि कोइरालां कलाः गीता ढकालयात स्यानाः मकवानपुरय् यंकाः गाडय् याःगु खः । कोइरालायात थ्वहे माघ ८ गते ज्वंगु खः । नेपाल प्रहरीया प्रवक्ता प्रहरी नायब महानिरीक्षक विनोद सिंहं बियादीगु जानकारी कथं सरकारी वकिलपाखें कोइरालायाके बयान कायेगु ज्या न्ह्याकाच्वंगु खः । वय्कलं धयादी – “कोइरालायात जिल्ला अदालत येँय्पाखें कर्तव्य ज्यान मुद्दाय् ई थप यानाः अनुसन्धान लिसे तहकिकात जुयाच्वंगु दु ।”
नेपाल प्रहरीं कोइरालाया विषयसं अनुसन्धान यायेत छु नं ढिलासुस्ती मयागु वय्कःया धापू खः । प्रवक्ता सिंहं मादक पदार्थ सेवन यानाः सवारी चलय् याइपिं विरुद्ध स्वनिगलय् न्ह्याकूगु अभियानयात देय्व्यापी दयेकेगु जानकारी नं बियादीगु खः ।
वय्कलं धयादी – “महानगरीय प्रहरी ट्राफिक ज्याकूपाखें वंगु मंसिर १७ गतेनिसें न्ह्याकूगु अभियानं सवारी दुर्घटना न्यूनीकरणय् बांलाःगु लिच्वः क्यंगुलिं देय्व्यापी दयेकेत्यंगु खः ।” स्वनिगलय् जक उगु दिंनिसें आःतक्क करिब प्यद्वः चालकत कारबाहीलय् लायेधुंकूगु दु ।
