लिखितयात मान्यता वीहेमाः

वंगु जनयुद्धया इलय् छेँ बुँ न्यायेमीगु नितिं जूगु लिखतयात मान्यता वीगु सरकारी निर्णययात कयाः नेपाली कांग्रेस व एमालेतय्गु आपत्ति व विरोध थुइकेमफूगु ज्या जूगु दु । छख्य सर्वोच्च अदालतं अन्तिम पटक धकाः खुलाया म्याद जक तनाः संविधान सभाया आयू क्वछीगु, मेख्य संविधान च्वयेगु ज्या न्ह्याकेमाःगु अवस्थाय् त्वहमदु त्वह तयाः संविधान सभाया वैठक अवरुद्ध यानाः यथास्थिति कायम यायेगु कांग्रेस व एमालेतय्गु संविधान विरोधी पहः खनाः मनूत अजू चायेगु यानाच्वंगु दु । जनयुद्धया इलय् छेँ बुँ न्यायेमीगु निसें, अंशवन्दा, वकसपत्र लगायतयात मान्यता वीगु धयागु छुंनं हालतय् जनसत्तायात मान्यता व्यूगु जुइ मखु । थ्व खँ कांग्रेस एमाले मस्यूगु मखु, तर त्वहः तयाः अग्रगमनया लँपु प्वाःतीनाः यथास्थिति कायम यायेत स्वयाच्वंगु इमिगु चाहना पूमवनिगु स्पष्ट खनेदया वःगु दु । नेपाली कांग्रेस व एमालें उगु अवधिया लिखतयात वैधानिकता विलकि विस्तृत शान्ति सम्झौता, अन्तरिम संविधान व प्रचलित ऐन कानुनया नं अःखः जुइगुलिं उगु ज्यायात गुगु नं हालतय् लितकायेमाःगु धयावयाच्वंगु दु । तर सरकार व एकीकृत नेकपा (माओवादीं) धाःसा उगु खँयात गुगु हालतय् लित कायेमफैगु खँयात स्पष्ट याःगु दु । वंगु विहिवाः च्वंगु पदाधिकारीतय्गु वैठकं नापं उगु खँयात लित कायेमफैगु खँ स्पष्ट यातं नं कांग्रेस एमालेत मानय् जुयाच्वंगु मदु । वंगु विहिवाः नं संसद अवरुद्ध यानाः प्यंगू संसदीय वैठकया ज्या पंगः थनावनाच्वंगु दु । जनयुद्धया इलय् गां गामय् जनताया छेँ बुँ न्यायेमीगु ज्या प्रचलित ऐन कानुनकथं जुइमफैगु खँ सकस्यां स्यूगुहे खँ खः । छेँ वा बुँ न्यायेगु यायेवलय् यक्कोय्स्यां ला शहर वजारय् वयाः मालपोत कार्यालयय् वनाः रजिष्टर पास यायेगु ई व अवसर मदुगुलिं गां गामय् च्वंगु जनसत्ता व जनअदालत पाखें ज्या कायेगु यानावःगु खः । छेँ बुँ न्यायेमीगु ज्यायात कानुनी मान्यता मवीगु धयागु न्याया सिद्धान्तया पाय्छि अःखः खः । न्यायेमीगु ज्या धयागु जनतायागु खः, इमिगु हित संरक्षणया न्ह्यसः खः । स्यूम्हं मिल व न्याःम्ह न्यात । अवलेया लिखतयात कानुनी मान्यता वीगु धयागु शक्ति सम्झौताया अःखः मखु, वल्कि उकियात हःपाः व लिधँसा वीगु खः । न्याम्हय्सित अवलेया लिखतयात वैधानिकत वीगु धयागु न्याःम्हय्सिगु अधिकारयात सम्वोधन यायेगु खः । न्याःम्हय्स्यां न्यात म्यूम्हं मिल । तर न्याःगु व मीगुया लिखतयात वैधानिक मविल धाःसा थुकिं तःधंगु समस्या ब्वलनी । कमसे कम न्याःम्हय्सिगु ध्यबा सितिं मवनेमाल । थ्वहे ज्या कांग्रेस एमालेपाखें जूगु खःसा मेगुहे धाइगु जुइ । तर थ्व ज्याय् कांग्रेस एमालेतय् सामन्त व जमिन्दारत मलायेवं इमित आपत्ति जुल । कालविल वा न्यायेमीगु ज्यानाप जनसत्तायात वैधानिकता वीन धकाः म्वाःसा म्वाःसां हल्ला यानाः संसदनापं प्यक्व प्यक्व अवरुद्ध यायेधुंकूगु दु । थ्व ज्या धयागु धात्थेंला संविधान दयेके मवीगु व शान्ति प्रकृया नं न्ह्याके मवीगु जक मखुला ? न्ह्यसः थनेगु असान्दर्भिक जुइमखु ।

अथ्यला कांग्रेस एमालें यानावयाच्वंगु संसद अवरुद्धयात ध्यानय् तयाः प्रधानमन्त्री डा. भट्टराईं थःपिनिगु उगु प्रस्तावयात लित कायेगु धकाः छलफलया झ्वलय् लित कायेगु खँ नं हःगु खः । तर माओवादीया वरिष्ठ न्वकु मोहन वैद्य किरणया खँ न्यनाः डा. भट्टराईं थःगु खँ लित कायेगु ज्या जूगु खः । पार्टी एकता लिपा “किरण” या खँ न्यनाः डा. भट्टराईं थःगु गल्ति स्वीकार यानाः भिंकेगु ज्या जूगु थ्व न्हापांगु पलाः खः । थ्वहे खँय् पार्टीया नायः प्रचण्डं नं सहमति यायेवं थुगु खँयात न्ह्यःने यंकेगु जूगु खः ।

More Stories Like this