‘थौं सहमति यायेगु अन्तिम कुतः’

येँ (झीगु स्वनिगः)

न्हूगु संविधान निर्माणया झ्वलय् विवादित जुयाच्वंगु विषय थौं आइतवाः तकया दुने सहमति यायेगु प्रमुख दलया नेतातय्गु दथुइ सहमति जूगु दु । सभामुख सुवासचन्द्र नेम्वाङ व संवैधानिक समितिया सभापति नीलाम्बर आचार्यया उपस्थितिइ शनिवाः च्वंगु बैठकय् उगु कथं सहमति जूगु खः । एकीकृत नेकपा (माओवादी), नेपाली कांग्रेस, नेकपा (एमाले) व मधेसी मोचाया शीर्ष नेतातय्गु दथुइ जूगु मु“ज्याय् अथे सहमति जूगु खः । मु“ज्याय् एकीकृत माओवादीया नायः पुष्पकमल दाहाल प्रचण्ड, नेपाली कांग्रेस सभापति सुशील कोइराला, रामचन्द्र पौडेल, एमालेया नायः झलनाथ खनाल नापं मेमेपिं नेतातय्सं ब्वति कयादीगु खः ।

संवैधानिक समितिं निर्धारण याःगु विवाद समाधान यायेगु ई थौं आइतवाः फुइत्यंगु दु । अथे थौं आइतवाः तकया दुने सहमति मजुल धाःसा बहुमतया आधारय् संविधानसभापाखें निर्णय यायेमालीगु अवस्था दु । उकिं हे प्रमुख नेतातय् दथुइ अथे सहमति यानाः वनेगु धकाः निर्णय जूगु खः । उगु बैठकय् एकीकृत माओवादीया नायः पुष्पकमल दाहाल प्रचण्डं थौं आइतवाः सुथय् मु“ज्या च्वनाः विवाद समाधान यायेगु जुइ धयादिल । थ्व हे दथुइ संविधानसभाय् दुथ्याःगु ३३ दलया नेतातय्गु नं मंकाः मु“ज्या म्हिगः शनिवाः हे जूगु दु । न्हूगु संविधानया नितिं मस्यौदा तयार यायेगु नितिं विवादित विषय ज्यंकेगु नितिं तयारीया झ्वलय् अथे ३३ दलया मु“ज्या च्वंगु खःसा अथे हे प्रमुख दलया शीर्ष नेतातय्गु दथुइ सहमति जूगु विषययात कयाः नं कनेगु ज्या याःगु दु ।

थौं आइतवाः तकया दुने नं विवादित विषय सहमतिया आधारय् न्ह्याः वने मफत धाःसा संविधानसभाय् यंकाः बहुमतया आधारय् निर्णय याइगु अले वर्तमान सरकार पक्षधरयाके हे बहुमत दुगुलिं कांग्रेस व एमालेया नेतात ग्यानाः सहमतिइ वनेमाली धकाः नरम जुयाः वःगु खः । संविधानया मस्यौदा हे जनतायाथाय् ज्वनाः वनाः जनताया सुझाव कयाः लिपा जक संविधानसभाया दुई तिहाइ बहुमतं पारित यायेगु प्रावधान तयातःगु दु । अथे सहमति मजुल धाःसा कन्हय् वनाः माओवादी व मधेसवादी दलत जानाः बहुमतया आधारय् माओवादी व मधेसवादीतय्गु प्रस्ताव हे पारित यानाः संविधानया मस्यौदाय् दुथ्याकेगु ज्या जुल धाःसा थःपिन्त तसकं ज्यामछिंगु अवस्था वइ धकाः तायेकाः हे लिपांगु इलय् एमाले व कांग्रेसया नेतात सहमतिया नितिं न्ह्याःवःगु खयेमाः धकाः मनूतय्सं अनुमान यानाहःगु दु ।