राजनीतिइ जनहितया ज्या मन्त
सरकारयात देय् चले यायेत ध्यबा मा:गु दु, अथे जूगुलिं मेगु खँ ला छु शिक्षा व स्वास्थ्य थुज्व:गु क्षेत्रय् जुयाच्वंगु व्यापारयात वनेगु त्व:ता: उगु व्यापारयात आधिकारिक मान्यता बिया: कर उठे यायेगु ज्या नं सुरु या:गु दु । धालधा:सा शिक्षा क्षेत्रय् हे सरकारया दकलय् आपा: लगानी दु धका: धाइ । स्वत धा:सा गांगामय् नं निजी ब्वनेकुथि दुहाँ वनेधुंकूगु दु व सार्वजनिक ब्वनेकुथि धइगु मास्तरतय्गु जागिर नयेगु ज्याकू जुया वनाच्वंगु दु । अले मास्तरत, कर्मचारी, प्रहरी, सेनायात जागिर नकातयेत सरकारं जनतायात शोषण यानाच्वंगु दु । सरकारयात थ: राष्ट्रपति, प्रधानमन्त्री, मन्त्री, सभासद्लिसें सेना, प्रहरी व कर्मचारी लहीमा: धइथें संस्थानपिन्त नं थ:थ:पिनि कर्मचारी लहीमा:, लव: दुसा बोनस नकेमा: । अथे जूगुलिं इमिसं नं ध्यबा हे माल । हानं भ्रष्टाचार नं यायेमा:गु जूगुलिं ध्यबा गाइमखु, उकिं नं आपा: ध्यबा माल ।
मेखे पार्टी(पार्टी सरकारय् वनेगु जुसेंलि कार्यकर्तातय्त लहीत अनेक नामय् आर्थिक सहयोगनिसें ठेकापट्टा बी हे माल । समग्रताय् स्वयेगु ख:सा सरकार धइगु जनताया नितिं गठन जुयाच्वंगु संयन्त्र वा संस्था मजुसें राष्ट्रपति, प्रधानमन्त्रीनिसें कया: पियनतकया छगू परिवार थें जूगु दु । थ्व परिवारं थ:पिनि नयेत व नकेत करया नामं ध्यबा म्ह: जुइगु ज्या यानाच्वंगु दु । संस्थानत नं थुकथं हे खनेदु । इमिसं बियाच्वंगु सेवा धइगु इमिगु व्यापारया सामान जक ख:, गुकी सत्ताया बलं इमिसं एकाधिकार कायम यानाच्वंगु दु । दकलय् अजू चायापुगु खँ ला छु धायेबलय् जनतायात सुलभ रुपं पेट्रोलियम आपूर्ति यानातयेत सरकारं दयेकूगु नेपाल आयल निगमं जनतायात सुलभ व सुपथ रुपं पेट्रोलियम पदार्थ मियाच्वंगु दु कि मदु धइगु खँ मजू, आयल निगम नाफा कि घाटा धइगु खँ जक आपा: जुयाच्वंगु दु । आयल निथम घाटाय् दुसा टाट पल्टे जूगु घोषणा याना: खारेज या:सां ज्यू, खुल्ला धेंधें बल्ला याना: हे निज? क्षेत्र पेट्रोलियम झिके याके बीमाल ।
सरकारं ल्हा:तुति हे त्व:ता ब्यूसा पेट्रोलियम पदार्थ नं मेमेगु वस्तु थें जुइ, अर्थात् व्यापारीतसें झिके याइ । अझ भारतीय हे वया: म्यू वइ ला ? छुं न छुं उपाय ला जु हे जुइ । वास्तवय् निजी व्यापारी वर्गं जनतायाके आपा: लव: कया: शोषण याइगुलिं जनतायात शोषण जुइके मबीत हे सरकारं संस्थान व निगम दयेका: ज्या याइगु ख: । मेखे शिक्षा स्वास्थ्य थुज्व:गु आधारभूत ख्यलय् ला सरकारं सकसितं नि:शुल्क सेवा यायेमा: । सरकारं जनतायाके कर कायेगुया मुख्य उद्देश्य हे थ्वहे ख: । थन जनहित धइगु सवाल हे तनावने धुंकूगु खनेदुगु दु । अ:खतं जनतायात दुरु न्ह्यायेगु साया रुपय् जक छ्यलाच्वंगु थुकिं स्पष्ट जूगु दु । सायाके दुरु न्ह्यायेत ला ग्वालां जंगलं घाँय् स्याउला हइ, भुसा चाना: नकी, कुँडो खुना: त्वंकी । सुसा:कुसा: हेरविचार चाइ ।
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
