सूचना प्रविधि मेला न्ह्यात
येँ (झीगु स्वनिगः)
सूचना व सञ्चार क्षेत्रय् जूगु नविनतम् प्रविधिया प्रदर्शनी क्यान इन्फोटेक मेला – २०१२ विहीवाःनिसें भृकुटी मण्डपय् न्ह्याःगु दु । उगु मेलाया उलेज्या यानादिसें विज्ञान लिसे प्रविधि मन्त्री कल्पना धमलां सूचना प्रविधि देय्या समग्र विकासया छगू महत्वपूर्ण माध्यम जूगु व थुकियापाखें सरकारया सुशासन व पारदर्शिताय् ग्वाहालि जुइगु धयादिल ।
वय्कलं देय्या ग्रामीण क्षेत्र व मिसा वर्गयात आपालं सूचना प्रविधिइ पहुँच व ब्वति कायेकेत प्रधानमन्त्रीया नायःसुइ सूचना प्रविधि परिषद् नीस्वना ज्या न्ह्याकूगु जानकारी बियादिल । नेपाल चेम्बर अफ कमर्सया नायः सुरेशकुमार बस्नेतं देशय् लोडसेडिङया अन्त्य मजूत्तले सूचना प्रविधिया आपालं उपयोग जुइमफइगु बिचाः तयादिल । कम्प्युटर एसोसिएसन अफ नेपाल (क्यान) पाखें ग्वसाः ग्वःगु उगु न्यान्हुया मेलाय् अन्तर्राष्ट्रिय क्षेत्रया न्हूगु व अत्याधुनिक मोडेलया कम्प्युटर, ल्यापटप, उकिया ज्वलं व इन्टरनेट कम्पनीया करिब सच्छि व नीप्यंगू स्टल प्रदर्शनी व मीगु नितिं तयातःगु दु ।
प्रदर्शनीया अवधिइ नेपालय् सूचना व सञ्चारया प्रविधिया आपालं उपयोगया नितिं रणनीति तयार यायेत निन्हुया सम्मेलन नापं ग्वसाः ग्वइगु जानकारी ब्यूगु खः ।
