भाःला क्वकाल तर .....

चिकंया भाः थकायेवं, भाः क्वकायेगु माग तयाः झिंस्वंगू विद्यार्थी संगठनतय्सं वुधवाः याःगु स्वनिगः वन्द बांलाक हे ताःलाःगु दु । व्यापक रुपं प्रहरी परिचालन याःसां हस्तक्षेप धाःसा याःगु खनेमदु । वन्द ताःलाःगु जक मखु न्हापा न्हापा स्वयाः खप्वःहे शान्तिपूर्ण नं जुल । गृहमन्त्रालयया विज्ञप्तियात छख्य तयेगु खःसा वन्द पूर्णत शान्तिपूर्ण व स्वस्फूर्तरुपं आम जनतां नं पासा विल । गल्ति व चुक चुकया पसःत वाहेक सतकया पसःत वन्दहे खनेदु, यातायात साधनय् व्यक्तिगत मोटरसाइकल छगःनिगः वाहेक यातायातया साधनत गनं चलय् जूगु खनेमदु । वरु टायर च्याकेगु ज्या धाःसा थाय् थासय् जूगु हे खनेदु । टायर मच्याकेगु धकाः यक्को न्ह्यःहे आन्दोलनकारीतय्गु पाखें बचं वियातःगु खः । थुगसी टायर च्याकेगु ज्यायात फयां फक्को त्वःतेहेमाः । ११ गतेया स्वनिगः वन्द क्वचाःसां सरकारं चिकंया भाः क्वकायेगु पाखे विचाःहे याःसां न्यायेगु मदुनि । भाः क्वकायेगु पल्सा भट्टराईया सरकारं विद्यार्थीतय्त ग्यास व मचिकनय् सहुलियत वीगु ज्याझ्वः न्ह्यःने हयेत्यंगु दु । थ्व समस्याया सही समाधान मखु ।

भाः क्वकायेमाःगु माग तयाः विद्यार्थीतय्सं न्ह्याका च्वंगु आन्दोलन विद्यार्थीतय्त ग्यास व मचिकनय् छुं छुट वियाः दीगु खनेदु । विद्यार्थी छुट वीवंहे आन्दोलन दीगु खःसा थ्व आन्दोलन कम व विद्यार्थीतय्गु स्वार्थ पूर्ति अप्वः जुइ । उकिं सरकारं विचाः याःथे विद्यार्थीतय्त ग्यास व मचिकनय् छुं छूट वीगुतुं आन्दोलन दिकी धकाः सरकारं सोचय् यानाच्वंगु खँ मचाखँ हे जक सावित जुइ । छाय् धाःसा थौंया आन्दोलन विद्यार्थीतय्गु थःपिनिगु नितिं मखुसे आम जनताया बबिक्वंलय्हे घाः लाकूगुया उपचारया निति खः । उकिं थ्व आन्दोलन दी मखु, अज्ज अप्वः न्ह्याः वनी, न्ह्यःने वनी । झिंस्वंगू विद्यार्थीतय्गु वर्तमान आन्दोलनया निगूगु ब्व म्हिगः निसें शुरु जुयाः वइगु १४ गते विद्यार्थीतय्सं आत्मदाह यायेगु ख्याच्वः वियातःगु दु । थुकियात सरकारं छु गुकथं काइगु खः, मस्यू । तर सरकारया आपूर्ति मन्त्रीं धयावयाच्वंथे भाः क्वमकायेगु खःसा १४ गतेया ज्याझ्वः छु जुइगु खः ? विद्यार्थीतय्गु मंकाः आत्मदाहया ज्याझ्वःयात नं स्वनिगः वन्दयाथें झारातारे यायेगु व विद्यार्थीतय्त छुं छूट वियाःहेकेगु ज्या यातधाःसा थुकिया लिच्वः सरकारया नितिं पक्का नं बांलाइ मखु ।

सरकारं विद्यार्थीतय्गु जायज माग प्रति सहानुभूति प्वंकाः इलय्हे सम्वोधन यायेगु पल्सा खँहे मल्हासे आन्दोलनप्रति मिखा तिस्सीत स्वयेगु भट्टराइया सरकारया नालायकीपन जक खः । चिकंया भाः थमकासे मेमेगु यक्कों वैकल्पिक उपायत दु । उगु विकल्पत मध्ये तप्यंकहे सर्वसाधारण जनतायात नकारात्मक प्रभाव त्वःतीगु ज्या, छाय् यात ? आम जनतां न्ह्यसः थनेगु यानावःगु दु । भाः थकायेगु पल्सा मेमेगु वैकल्पिक उपायत छ्यले ज्यू । तर सरकारं थुकिं पूर्णत व्यागलं च्वनाव्यूगु स्पष्ट दु । विद्यार्थीतय्गु माग सम्वोधन यायेगु पल्सा सरकार हानं म्हिगः सुथय्हे पेट्रोलियन पदार्थय् भाः छुं क्वकाःगु दु । ग्यासय् ८५ तका, पेट्रोलय् स्वतका व मचिकं अले डिजेलय् प्यतका प्यतका ध्यबा क्वकाःगु दु । थुलि भाः क्वकायेवं आः विद्यार्थीतय्गु आन्दोलन छु जुइ ? न्ह्याः वनी लाकि दी ? दिके धाःसा थ्व सरकारं विद्यार्थीतय्गु मागया पूर्ण सम्वोधन याःगु हे मदुनि । आन्दोलन मदिकल धाःसा सरकारं म्हिगःथें आन्दोलनयात स्वजक स्वयाः सुम्क च्वनी मखु । दकले विचाः यायेमाःगु खँला छु धाःसा विद्यार्थीतय्गु निर्णय छु गुज्वःगु जुइ ? आन्दोलनयात न्ह्यःने यंकी लाकि दिकी ? आम जनता उत्सुक जुयाः स्वयाच्वंगु दु ।

More Stories Like this