प्रधानमन्त्रीपाखें सुसान व समृद्धिया योजना घोषणा

येँ (झीगु स्वनिगः)

प्रधानमन्त्री डा. बाबुराम भट्टराई नं मन्त्री व सचिवतय्सं ज्या याइगुयात मूल्याङकन यानाः पुरस्कार व दण्डित यायेगु जुइ धकाः धयादीगु दु । उकिया नितिं केन्द्रपाखें अनुगमन पुचः खटेयायेगु जुइ धकाः नं वय्कलं धयादिल । आर्थिक बृद्धिदर अप्वयेकेगु नितिं थः सक्रिय जुइगु जुइ धकाः नं प्रधानमन्त्रीं धयादिल । सरकारया नेतृत्वं याःगु न्यालालिपा वय्कलं योजना अयोगया कार्यकक्षय् सुशासन व समृद्धिया नितिं निगू घोषणा यानादीगु खः ।

राज्यया संरचना पुलांगु हे दुगु व साधन स्रोत दुरुपयोग जूगु कारणं जनतायात राहत बिइत थाकुयाच्वंगु दु धयादिसें वय्कलं कर्मचारी प्रशासनपाखें जनमुखी ज्या जुइ मफुगु खः धकाः नं धयादिल । सुशासनया बारे सरकारया कार्ययोजनाबारे जानकारी बियादिसें प्रधानमन्त्रीया कार्यालयया सचिव लिलामणि पौडेलं सेवाग्राहीं इलय् हे ज्या मजुया क्षति जूगुलिं सम्वन्धित कार्यालयपाखें हे क्षतिपूर्ति बिइमाःगु नीति कयागु दु धकाः धयादिल । अर्थ सचिव कृष्णहरि बा“स्कोटां पूर्व पश्चिम रेलमार्ग दयेकेगु लगायतया १८ गू ज्याझ्वःया बारे जानकारी बियादिल । उकिया नितिं कर्मचारी संचय कोष व नागरिक लगानी कोषपाखें रकम परिचालन यायेगु जुइ धयादिल ।

कर्मचारीया तलब छन्हुया कटौति यानाः जलविद्युतय् लगानी यायेगु नापं अपाङयात मासिक १ हजार तका बिइगु धकाः नं धयादिल । बालं तयाः ब्वनाच्वंपिं व गरिब विद्यार्थीया नितिं ग्यास व मचिकनय् राहतया ज्याझ्वः नं दुथ्याकूगु दु ।
ज्याझ्वलय् मन्त्रित, नेपाल सरकारया सचिवत नापं उच्चपदस्थ कर्मचारीतय्गु नं उपस्थिति दुगु खः ।