सद्भावना पार्टी हाकनं तज्यात
येँ (झीगु स्वनिगः)
वर्तमान सरकारया स्वास्थ्य तथा जनसंख्या मन्त्री राजेन्द्र महत्तो नायः जुयाच्वंगु सद्भावना पार्टी हाकनं तज्याःगु दु । न्याम्ह सभासद् दुगु उगु पार्टीया सभासद्पिं गौरी महतो व रामनरेश राय नं राष्ट्रिय सद्भावना पार्टी गठन यानादीगु दु । न्हूगु पार्टी गठन जूगु दु धकाः म्हिगः विहीवाः वय्कःपिं निम्ह सभासद्पिन्सं व्यवस्थापिका संसदया सभामुख सुवासचन्द्र नेमवाङयात जानकारी बियादीगु दु ।
थ्वसिबें न्ह्यः नं प्यम्ह सभासद् नापं सदभावना पार्टी कुचा जुयाः अनिलकुमार झाया नेतृत्वय् संघीय सद्भावना पार्टी गठन जूगु खः । आः हाकनं सद्भावना पार्टी तज्यायेवं महत्तोया नेतृत्वय् दुगु सद्भावना पार्टीइ आः स्वम्ह जक सभासद्त ल्यंदनि । संविधानसभाया चुनाव लिपा ९ म्ह सभासदत दुगु सदभावना पार्टीइ आः नायः महत्तो, लक्ष्मणलाल कर्ण व सरोजकुमार यादव जक ल्यंदनि । अथे सद्भावना पार्टी तज्यानाः न्हूगु पार्टी दर्ता जुइवं आः संविधानसभाय् मुक्कं यानाः ३३ दल थ्यंगु दु ।
